Aizawl; Chief Minister Lal Thanhawla chuan, "Mizoram pawna Zo hnahthlak ten Mizoram hi an inpui 'Jerusalem' ah an ngai a, keimahni zawk hian zirtur kan nei a. Kan unaute hian inzawmkhawm leh hi an duh a ni," a ti. Nimin khan Cabinet room-ah chanchinbumite kawmin Chief Minister hian tunhnaia Myanmar a tlawh chanchin a sawi a, “Myanmar-a Zo hnahthlak awmte hi keini aiin an khawsa nuam a, an inlungrual bakah kut tling lova sum lakluh an duh lova, an entawn tlak hle a ni," a ti. Myanmar a Zohnahthlak awmte chu sawrkarah an inghat lo nia sawiin, "Sawrkara thawh chu hlawh a tlem avang leh anmahni a thawh a hlawk zawk avangin an duh lo a. Thalai ten thawh hreh an nei lova, khawlaia rui buai hmuh tur an awm lo,” niin a sawi. Chief Minister chuan Myanmar Zohnahthlak ten ramri atanga km 25 ve ve huam chhungah Visa tel lova intlawhpawh theih ni leh se an duh nia sawiin, “Delhi kal hmasak bera kan home work tur a ni,” a ti a. Khampat Bungpui chu Zofate tan heritage ropui ber pawl nia sawiin tuilianin a lak mai lohnan chhan dan ngaihtuah a ngai tih a sawi a, a tul anga India Consul General pawhin hmalak pui a tum tih a sawi bawk. Myanmar a zin tuma Chief Minister tawiawmtu Parliamentary Secretary Joseph Lalhimpuia chuan Chief Minister zin chuan Zohnathlak inunauna ah kawngro a su dawn niin a sawi a, “Chief Minister zin hi an lo ngai pawimawh a, hnam hrang hrang te huikhawmin rahbi thar a siam a. Hnam dang mite hmuhah Zohnahthlak hmel a ti danglam a ni," a ti. Central YMA General Secretary Lalhmachhuana chuan Myanmar Zohnahthlak ten an nihna ang anga pawm an duh thu leh unau kan nihzia tihlan an duh tih a sawi a, "Myanmar-a kan unaute nen inzawmna tha kan neih theih nan YMA chuan tan lak zel a tum a ni," a ti bawk. MZP Vice President B.Vanlaltana pawhin Myanmar a Zohnahthlak awm ten tha takin an lo dawngsawng nia sawiin, "Mizoram hian an lung a len hle a ni," a ti bawk.