ZALEN July 12, 2024; Kumin 2024 January ni 26 a Aizawl a Zo Puakphur ding thar chuan Mizo thalai engemawzatte tan hnathawh tur remchang an siamsak mek a, tun thlengin mi 350 vel inziaklut an awm tawh.

Zo Puakphur hi thalaite hmakhawngaitu thian pahnih tena an din a ni a, chung Managing Director pahnih te chuan hnathawh tur chi hrang hrang - mutia hna, pem tur bungraw pack sak, pem bungraw thiarsak - load leh unload hna, dawr bungraw load leh unload te, brick thiar cement thiar leh balu thiar te, mihring tha hmanga thawh chi hna engkim mai thawh tur neite an ngaihven a, an hnenah chutiang hna thawk duh thalaite chu an in register a. Hnathawh tur remchang apiangah chung an hnena in register te chu hna an lo siamsak thin.

Zo Puakphur hotu ten ZALEN an hrilh danin, Aizawl khawpui chhungah hnamdang hnathawk (dawrkai, inhlawhfa/muṭia etc.) an inkhuar nghet tawh hle a, chung mite chu Mizote tan luahlan mai theih pawh an ni tawh lo.

Mizo thalai taima leh lehkha zir pah a mahni intodelh tum an tam tawh a, chutihrual chuan zing dar 9 atanga tlai dar 5 chhung chauh hna thawh hun ti erawh kan la tam, hei hi kan insiam thatna tur niin a lang, an ti a, zingkar leh zan lam thleng pawh a hnathawh huam tura tan kan lak deuh deuh a ngai an ti bawk.