Aizawl: Home Minister R.Lalzirliana chuan, “Zo ze mawi tel lo thiamna chu thil hlauhawm tak a ni,” a ti. Thingsulthliah Teachers Association in Zirtawpni a Thingsulthliah atanga Pawl 10 leh 12 pass tharte lawmpuina hun Thingsulthliah Community Hall-a neih a hmanpuinaah he thu hi sawiin Home Minister chuan zirlai pass tharte chu tuna an hlawhtlinna chu bultanna tur chauh a ni tih hriaa inthununna, thuawihna leh taimakna nena zir zel turin a fuih a. “Khawi hmunah pawh awm ila Mizo kan nihnaah chiang tlatin Mizo nun ze mawi chawinung zel ang u,” tiin incheina tha ber chu silh leh fen ni lovin thiamna a nih zawk thu leh thiamna chhawr tlak, kan ram chauh nilo ram pawn thleng pha nei ngei tura tan la turin kalkhawmte chu a chah bawk. Kumin HSLC result puan takah khan Thingsulthliah khuaa High School pathum atanga zirlai exam beitu 73 zinga 64 (84.9 %) te an pass a. HSSLC exam beitu 38 zinga 35 (92.1%) te an pass a ni. Pass tharte hi chawimawina certificate leh thilpek hlan an ni.