Aizawl: Aizawl khawpui titawptu tih hiala an sawi thin Aizawl Sipai Lammual bula, Fly Over Bridge-ah ruihhlo zuar leh damdawi avanga talbuaiten hmun an la khuar zel a, helai hmun hi Aizawl khawpui lunlai taka awm a nih angin Aizawl a titawp hle tih helai hmun paltlang thinte chuan an sawi. Lammual bula lei (Bridge)-ah hian eng hun ah pawh mi thahnem tak an ding khawm luih luih reng a, helai hmuna kal te wallet leh mobile phone te chu a bo fo thin a ni. Helai hmun vil thintu Police ASI pakhat chuan'kan hmel an hmuh rual rual in an tlan chhe nghal thin a, report te chu han dawng ve bawk thin mahila man erawh an har hle a ni' a ti. Lammual bula Bridge zawh thin nu pakhat chuan a thil tawn hetiang hian Zalen a hrilh. "Nula upa lo tak pakhat hian phone hman min dil a, tih tak zet a min ngen hnu ah ka hman tir a, vawi leh khatah a tlan ta vak mai a, ka hrilh hai lutuk chuan um zui ngaihna pawh ka hre lo a, police-ah ka report-a tun thlengin ka phone hi ka la hmu let lo a ni," a ti. Ruih sual avanga in sual, in hnek ta bawrh bawrh pawh helai hmunah hian hmuh tur an awm fo a. Thenkhat in sumdawnna hmun atan lo hmangin mobile phone leh thawmhnaw second hand lo zuar tawk an awm bawk a. Ruihhlo zuar te hmunpui ti hial a sawi theih khawp in helai hmun ah hian ruihhlo eng chi pawh lei tur a awm reng nia thudawn a ni. Lammual bula Fly Over Bridge hi Tuikual branch YMA huam chhung ami a nih angin, Tuikual YMA te hian helai hmun tawp tak tih reh tum hian hma an la fo a, zan lamah te duty in YMA member te an thawk chhuak thin a. Tuikual YMA ten hma an lak chhung hi chuan han reh deuh thin mahse hun rei lote-ah helai hmuna in khuar thinte hi an reh rei ngai chuang lo a. Chhun lama ruihhlo zawrhna hmun tia sawi theih hi zan lamah pawh a lun thin hle a, nawhcAhizuar 'KS' tia sawi te in zawrhna hmun atan an hmang leh thin niin mi pakhat chuan Zalen a hrilh bawk. Lammual leh a chhevel, Vanapa Hall bul vel hi Aizawl khawpui ti 'Sodom tu' tih hiala sawi thin a ni a, KS leh ruihhlo zuar leh ruihhlo ngaite fuankhawmna hmun a ni a, kum tam tak liamta atang khan he hmun hi bu khuarna In pui berah hman a lo ni fo tawh thin a ni.