Aizawl: MNF Thalaite chuan nimin khan Thuampui-ah SIPMIU kaltlanga Aizawl khawpui bawlhhlawh paihna motor to uchuak taka lei nia sawi chu an enfiah a, UD&PA Minister Zodintluanga chu mawhphurtua an ngaih thu leh bang tura an phut thu an sawi. MNF Thalaite hi an Vice President H. Lalramdinliana leh Treasurer Lalzahawma hovin bawlhhlawh paih motor hi Aizawl Thuampui vengah lo changin, a tawih thei leh tawih thei lo phur lirtheite chu lo tidingin an enfiah a, SIPMIU-in heng lirthei a leina zat nia sawi chu a to uchuak hle nia an hriat thu leh he thilah hian thil dik tawk lo inphum ru ngeia an hriat thu an sawi a. MNYF Treasurer Lalzahawma chuan, “Minister Zodintluanga enkawl department hnuaiah Dihmun zawla PHE building leh tuizem lian pahnih thiat turin tender chhuah lovin cheng nuai 63 chuang hman a ni a, Power Sub-Station hmunzawl sa laihna atan cheng nuai 35 chuang sen a nih bakah quarter kawtzawl dawlna tur leh varanda dona atan cheng nuai 16 chuang  hman a ni a, hemi atang ringawta dik lo taka sum hman belhkhawm chu cheng nuai 115 chuang a tling a ni,” a ti. MNF Thalaite chuan Mizoram sawrkarin bawlhhlawh paihna tur LPK 407 sawmnga an leiah ringawt hian motor man pangngai baka an sum hman tamna hi Rs. 500,00,000.00 aia tlem lo niin an sawi.