Aizawl: Hnianghnar zawka Aizawl khawpui tui intur pekna project thar lungphum chu nimin khan UD&PA Minister Zodintluanga chuan a phum. Ni tina tui maktaduai litre 37 pe thei tur Aizawl tui lakna thar lungphum hi Tlawng lui kam, Tanhril Mualkhang rama Setlak lui chhuahah neih a ni a. Lung phumtu UD&PA Minister Zodintluanga chuan thu sawiin, “Aizawl khawpui chawmtu tur Greater Aizawl Water Supply Scheme Phase I&II te hi a khawl a hlui tawh bakah nitin tui mld 34.8 pump theia ngaih an ni a. Tuna siamthar leh tum mek hi tluang taka zawh anih hun chuan ni tin tui mld 37 a pump thei dawn a. He project hi tihpuitlin a nih chuan Aizawl mipui tui dawn theih chu chawhrualin ni tin litre 135 a ni dawn a, kum 2033 thleng chuan tui harsatna awm lo tura ngaih a nih avangin kan mamawh a phuhru thei dawn a ni,” a tiin a sawi a. Minister chuan tuna Aizawl khawpui tui semna (distribution network) hman mek chu kum 39 a upa a nih tawh avangin a thara thlak a ngai tawh dawn tih a sawi a, a thlak hna hi SIPMIU-in a thawk mek nia sawiin tui pipe 362 km vel phum tura ruahmanah a zatve dawn zo tawhin thawh chhunzawm mek a ni tih a sawi bawk. Zodintluanga chuan veng tina tui dahkhawlna tuizem lian pawh siam belh zel a nih thu a sawi a. SIPMIU Project hnuaiah hian Project -I, II, leh III ah tuizem 30 siam tura ruahman niin 19 chu zawhfel a ni tawh a, 20 dang pawh peihfel tep a nih tawh thu a sawi a. Tui pump-na atana hman tur liau liau in Power pekna tur (Dedicated Power Supply System) buatsaih mek a ni a, tunah hian 132 Kv sub-station leh a hrui kalna tur tower 20 buatsaih hna pawh zawh fel mai theih turin thawh mek a nih thu a sawi bawk.