April 21, 2023; Vawiin khan Zodintluanga'n Mizoram Pradesh Congress Committee (MPCC) president Lalsawta hnenah MPCC treasurer atanga banna a thehlut. 

(BANNA A THEHLUH A A THU KIMCHANG KAN HAN TARLANG E)

To,
                        The President,
                        Mizoram Pradesh Congress Committee

Subject :          MPCC Treasurer atanga banna.

Ka pu,
                       Nangmah zah em em leh hreh tak chungin MPCC Treasurer ka nihna atangin banna ka rawn thehlut a ni tih a hmasa in ka rawn hriattir a che.

Pathian, nangmah leh ka thawhpui kan hotu dang te duhsakna avang liau liau in kei teh lul, a tling lo ber hi MPCC treasurer atan te hial min lo dah ve hi ka lawm in ka phur em em thin a. Lungrual takin kan thawkho ang a, kan ram, Mizoram tan leh kan party tan nasa takin kan bei tlang ang a, kan hma lawka MLA  General Election-ah Congress Party in hnehna nasa tak kan chang leh ngei ang tiin beiseina sang tak ka lo nei ve thin a ni.

Amaherawhchu, ka beisei angin thil a kal ta hauh lo mai a. Banna rawn theh luh mai loh chu tih theih nei ve a ka inhriat tak loh avangin hreh tak chungin i hnenah he ka “Banna” lehkha hi ka rawn theh lut ta a ni e. 

Loh theih loh a ban ngai nia ka inhriatna chhan te zinga point tlemte kan tarlang ang e:

I. CONGRESS PARTY INNGHAHNA LUNGPHUM SAWINGHIN A TIH CHHIAT MEK A NI

(a) MPCC President zahawm tak kalchhuak ta Pu Lal Thanhawla leh Mizorama Congress Party hruaitu hlun leh zahawm tak tak kal chhuak ta te zawng zawngin, zah taka an lo humhim thin leh kalphung nghet tak a an lo vawn tlat thin, “Indian National Congress” chu Committee a inghat a ni a, engkim a reltu dik tak Committee in a an lo rel thin a, “Constitution of the Indian National Congress” Article III ah leh “Mizoram Pradesh Congress Committee,” DAN BU Article IV pawhin chipchiar taka alo tarlan – hetiangin 

1. Unit Congress Committee (UCC)
2. Group Congress Committee (GCC)
3. Block Congress Committee (BCC)
4. District Congress Committee (DCC)
5. Pradesh Congress Committee (PCC)
6. Congress Working Committee (CWC)
7. All India Congress Committee (AICC)

Hetiang hi kan kalphung thin leh kan kalphung zel tur anih laiin, kum 2021 MPCC President i rawn nih tak atang kha chuan heng kan lungphum pawimawh tak tak Indian National Congress siamtu kan lo tih thin zawng zawngte chu sawi nghin leh sawi chhiatin a lo awm ta a. Executive Committee leh Committee sang tak taka kan lo relho thin zawng zawng te pawh chu President-in mi pahnih khat lek rawnin thutlukna i siam ta fo mai a, collective leadership i lo sawi mawi em em thin chu a taka hmuh tur a awm ngai ta lo, chuvang chuan he Treasurer post zahawm tak
hi chelh reng thei niin ka inhre lova, banna ka rawn theh lut ta a ni.
(b) District Congress Committee elected office bearer post te pawh hi tihdanglam a lo ni fo tawh thin a, chu’ng ah chuan MPCC executive committee-ah rel hova, thutlukna siam alo ni tawh thin a. President i lo nih hnuah erawh chuan Lunglei District Congress Committee siamrem anih khan eng committee-ah mah relho a ni lova. Nimin maia Aizawl District Congress Committee siamrem anih pawh khan eng committee-ah mah relho a ni ta chuang lova, hei hi Congress kalphung a ni lova, committee rorel a kal thin, hetianga mi pakhat duhdana kan kal hi kei chuan a tha ka ti lova, elected OB te pawh biak rawn a, rorel a awm ngai chuang lova, hei vang hian he nihna zahawm tak hi chelh reng ka tan a rem tawh loah ka ngai a, banna ka rawn thehlut a ni.

II. NOMINATION COMMITTEE CHUNGCHANG
Nomination Committee din a nih dawn khan member inruat chungchangah rawn ka ni lova, member i duh ang i ruat hnuah telephone-in min hriattir ve lek a. Tunhnaia member pathum ruat belh an nih khan rawn ka ni lova, ka hre lo hrim hrim a, elected OB ka nih zui zel hi a tulna awmin ka hre lova, i sawi thin anga collective leadership-a kal a, in rawn tlan a awm tawh chuang lova, chuvangin treasurer ka nihna atanga ban mai hi ka thutlukna a ni.

III. POLITICAL AFFAIRS COMMITTEE (PAC) CHUNGCHANG

Kan party hotu thenkhatte tawngkam ka lo hriat danin Political Affairs Committee hi i ring zo tawh lova, PAC meeting koh pawh tul i ti tawh lo tih pawh mi engemawzah hnenah i sawi a. Tuna PAC member-te hi duhsak taka vice president leh president thlenga hlangkaitu che an nih avangin zah leh ngaih pawimawh an tul hlein ka hria. Chuti chunga i elected OB puite hriatpui lova nangmah duhsak em emtu PAC member nilai mekte thiat a, PAC thar siam i tum tih ka lo hria hi a lungchhiatthlak hlein ka hria.
Tha zawk nia kan hriat ve te ngaih pawimawh a ni lova, chumi piah lamah party rorelna sang committee te ngaih pawimawh an ni tawh lova, chuvang chuan he treasurer nihna zahawm tak hian tangkaina leh hlutna engmah a neih tak loh avang leh kan party chaknan leh inpumkhatna atana theihtawp chhuah ve kan lo tumna ten awmzia engmah a neih tak chuang loh avang hian treasurer nihna ka chelh zui zel hi a rem tawh lo ah ka ngai a, banna ka rawn thehlut ta a ni.  Hei hi kan party chak zawk nan leh inlungrual tlan na atana ti ka ni e.

Dated 21 April, 2023 Aizawl        (ZODINTLUANGA RALTE)