Aizawl: Thorang bialtu MLA Zodintluanga Ralte chuan Lunglei Civil Hospital tana RT-PCR khawl a pek chu bun thuai turin a ngen.

Nimin khan Chief Minister hnenah lehkha thawnin Zodintluanga Ralte chuan Chhimlam mipuite tana RT-PCR khawl a pek chu ‘politics’ inbeihna hmanruaah a tang ta hlauh zawk nia sawiin hrehawm a tih thu a sawi a. Tunhnaia Civil Hospital Lungleia COVID-19 Test-na hmanrua pakhat TrueNAT Quattro dah belh tura an tih chu RT-PCR aiin a ‘test’ muang zawk hle tih sawiin chhim lamah hri vei hmuh chhuah thar an tam tak zel avangin TrueNAT khawl ringawt hi chuan an mamawh a phuhruk zo dawn lo niin a sawi a. 

Mipui mangang au aw hian ram hruaitu lu ber a auh ei ngei kei chuan ka ring tlat a, Zoram tana i thatlai hun zawng petu i ni a, he hun harsaah pawh hian Mizoram chhim lam mipuite tana tha ber tur ruahmanna i siam ngei ka ring tlat a ni,' tiin hripui doa tanrual a hun lai taka RT-PCR khawl hmanga ‘politics’ a inbeihna hi a tawp theih nan te, ‘politics’ inbeihna a hmatheh (scapegoat) atana sawrkar hnathawkte hman an nih tawh loh nan te leh ‘political party’ te hi hripui doin kan tangrual a ni tih mipuiin an lo hriat nan te i thuneihna hmang turin thinlung takin ka ngen che a ni, a ti bawk.