Thenhlum : Nimin khan Thorangbialtu MLA leh Minister ni bawk Zodintluanga chuan a bial chhung Stone Quarry, Tleu Quarry tia hriat lar tun hnai ruahsur nasa tak vanga chim chu a hmunah tlawhin lirthei a kal tlang leh thuai theih nan Thenhlum, Tleu leh Bunghmun khawtlang hruaitute nen ruahmanna siamin lirthei kaltlang leh thuai thei turin hmalak a ni a. Minister hian Quarry chimin a nghawng mipuite thlamuan tur leh an harsatna tawhte sutlian pui tura kal a nih thu a sawi. Lunglei District chhunga awm Thorang Assembly Constutuency-a Tleu Quarry hi inkalpawhna kawngpui pawimawh tak Phairuang Bunghmun Road (PB Road) in Bunghmun khaw thlen hma lawkah a paltlang tih bialtu MLA leh Minister ni bawk Zodintluanga chuan a sawi a. Quarry hi tlang chhip thlenga lung invuahthuah a nih avangin a chim hian kawng hi a la vek a, a helna tur remchang siamna mai tur a awm rih loh avangin mipui harsatna nasa lutuk tur sutkian thuai a nih theih nan theih tawpa hmalak nghal a nih tur thu khawtlang hruaitute hi a hrilh a. “A theih dan dana lirthei kaltlang thei tura hmalak nghal a ni ang,” a ti a. Bialtu MLA leh Minister ni bawk Zodintluanga chuan, “Ration buhfai leh chak lakna kawng ber a ni a. He kawng kaltlanga chawm khaw hnai vai Bunghmun, Sesawm leh Laisawral te an khawngaihthlak hle a, Quarry chim hian kawngpui chimpui vek mahse a hmun ngaia kaltlang a nih leh theih nan theihtawp kan chhuah nghal ang,” tiin a sawi a ni.