Aizawl: Mizo Zirlai Pawl (MZP) chuan Zophaia Zofate Chawlhbuk an din tawhna, tunhnaia Assam sawrkarin thiata police duty post an dinnaah Zofate Chawlhbuk din leh ngei an tum. Nimin khan meeting neiin Bairabi Zophaia Zofate Chawlhbuk chungchang hi an sawiho a, meeting an neih zawha thuchhuah an siamah MZP chuan March 2, 2018-ah Assam-in Mizoram chhungah hna rawn thawka police duty post an rawn siam chu MZP chuan na a tiin a dem hle tih an sawi a. Assam sawrkarin hna an rawn thawhna chu Mizoram chhung, Mizoram chief minister hmasa ber Ch Chhunga ram (leilet) a ni tiin Mizoram chhung a nih avangin Zofate Chawlhbuk sak dawnin Assam sawrkar hnenah engmah a thlen lo tih an sawi a. Mizoram chhungah Assam-in hna an rawn thawk hi Mizo mipui tawh phawt chuan na an tih MZP chuan a ring a, chutih laia Mizoram sawrkar a ngawi reng mai leh Zofate Chawlhbuk Assam-in an thiah thu-ah te pawh engmah hre lo ang maia Mizoram sawrkar a awm chu MZP chuan pawi a tiin a dem tak zet tih an sawi. MZP thuchhuah chuan ramri buaina vei tur leh ram hauhva tang turin sawrkar an ngen a, Bairabi leh hmun danga harsatna awmte chinfel tum tur leh Assam-in sikul an dinte leh police outpost an neihte bakah Assam lamin huan an rawn siamte ngaimawha chhuahtir turin Mizoram sawrkar an phut tih an sawi bawk.