ZALEN April 7, 2026 : Vawiin khan MNF chuan AMC inthlan lo awm tur atana inhmuhkhawmna Tuikual South Jubilee Hall-ah an buatsaih a. He hun hi MNF Treasurer Lalruatkima chuan a hmanpui a. AMC Ward XII candidate C Vanlalchanchinmawii pawhin thu a sawi bawk a ni.

Lalruatkima chuan, "Zofate Jerusalem Aizawl enkawl tur hian Nationalist party MNF kan tha ber. Pathian leh kan ram tan tia bei tlattu, he ram leh he hnam chhiat leh thata mawh la ngam MNF hi Aizawl leh Zoram tan kan tha ber," a ti a. "MNF chuan Aizawl State Capital hi hmun danga sawn ve kan tum lo," a ti bawk.  

Ruatkima chuan, "MNF-in Aizawl leh Mizoram tana hmasawnna hna a thawh tawh zawng zawngte thlir hian a ropui a. Hmuhnawm tham a tling a ni. Engmah ti mang lova min puhtute dawt sawi hi a hre chiangtute chu mipui an ni. Pathian leh mipui zarah kum 2028-ah MNF hi a sawrkar leh dawn a, he hnam leh ram tan leh kan sakhaw tan kan beih chhunzawm zel dawn a ni," a ti bawk.

Ruatkima chuan, "Aizawl khawpui enkawl tur AMC Election-ah MNF in candidate kan nei tha ber a. Kan candidate zingah AMC corporator/Councillor thin mi 4 awmin, Secretary Govt of Mizoram pension, Sport lama India ram aiawha mekte, Kohhran Upa, Bial KTP Leader leh YMA hruaitute, Zoram thalaite entawn leh ngaihsan rawn te an awm a ni. Party dang han en hian an team a tha tawk lo hle tih kan hre thei awm e. MNF team te erawh an chhuanawm hle a ni," a ti a. "ZPM hian AMC candidate an in set hlum kan ti lo thei lo a ni," a ti bawk.

MNF Treasurer chuan, "MNF-in AMC atan team tha tak kan din a, he kan team din hi min pawmpuia Aizawl khawpui hmasawn nan min vote pui vek turin mipui kan ngen a ni," a ti.

R Thanglura, ex Dy Mayor pawhin thu sawiin, "Pathian leh mipui zarah beiseina sang tak kan nei mek a, MNF party worker zawng zawngte taima takin i thawk ang u. Ther hlo nen, buhfai bag leh thil te tham té té te tiamin, a chhe thei ang berin ZPM-in min bei mek a. Mawi tak siin kan tan ve a ngai a ni," a ti.