BJP thuthlung lakna RSS: Kumin 2018 MLA inthlanpui kan hmachhawn mekah hian political party hrang hrangte BJP thawhpui leh thawhpui loh chungchangah nasa takin an inpuh tawn a, thil dang zawng aiin he thil hian chanchin tharah hmun pawh a luah a ni. Hetih lai hian chanchinthar thehdarhtu pakhat, Firstpost-in Nov 22, 2018 chhuakah MNF President chuan BJP hi Kohhran zahawmna tihniam theitu niin a ngai lo tih ziakin, “BJP hian kan ram chhung zau takah rorelna a chelh mek a, Kohhran zahawmna a tihchhiatna ka hre lo,” tiin a sawi tih a lo lang a (“BJP is ruling a large part of the country. It is not harming the dignity of Church anywhere,” Zoramthanga says - https://www.firstpost.com/politics/bjp-quest-to-bloom-lotus-in-mizoram-assembly-faces-great-wall-of-mizo-national-front-in-elections-5597161.html  Accessed on 23.11.2018). Hmar chhak biala kua hreuh hi RSS ho hian an duh em em a, chumi tihpuitlin nan chuan NORTH EAST DEMOCRATIC ALLIANCE (NEDA) hi an din ta a.  NEDA nihphung hi kan chian viau a ngai.  North East Democratic Alliance (NEDA) hi May 24, kum 2016-a BJP President, Pu Amit Shah leh BJP General Secretary, Pu Ram Madhav te leh North East Zonal Organising Secretary, Pu Ajay Jamwal te huaihawtna hnuaia din a ni a. Anni hi RSS rawngbawltu lawk, Pracharak  an tih, RSS university a train chhuak, thil ruahman thiam elkhen an ni.  Hmar chhak biala BJP zung kaih theih nana helaia Tualto party (regional party) ho huikhawm a bul tan hi a ngaihtuah chhuaktu chu a chunga mite pahnih hi an ni a; Pu Zoramthanga pawh hi a tir tê atanga a dintu zinga mi a ni a, chutiang bawkin Pu Conrad Sangma, NPP President (a pa P.A Sangma, March thla a thi ta aiawh) pawh a bul tantu zinga mi a ni bawk. Pu Amit Shah leh Pu Ram Madhav te hi BJP mi namailo, an party tana thluak bur an ni. NEDA member nghet ni mekte chu hengte hi an ni:Hmar chhak biala NEDA insawh ngheh chhoh dan tlangpui tawite tein tarlang ila: • Arunachal: September 16, 2016-ah Chief Minister Pema Khandu leh a pawlte MLA 43 chuan Congress chhuah sanin BJP suihzawm People’s Party of Arunachal (PPA) chu an zawm nghal. BJP-in zung a kaih tan ta. • October, 2016-ah chuan PPA chu BJP-ah an inchhung lut a, CM thar Tamiyo Taga chu CM atan lak luh a ni. BJP-in state 15-a rorelna an chelhna a ni a.   December 21-ah chuan chhungril buaina (lal inchuhna-a hiattu BJP nia ngaih) kal zelah Pema Khandu ngei chu an party President chuan a suspend a.  Pema Khandu a diau lo, hemi thla vek hian Pema Khandu leh PPA-a MLA 43 zinga amah tantu 33 leh independent 2 te nen majority an chang leh ta a, hei hi BJP lamin an lo hup chat mai. Tichuan, BJP chu a aia nghet zawkin a insawh phun ta zel. • March thla 2017 Manipur inthlanah chuan hetiang hi an seat neih dan a ni:- Seat awm zat: 60. Congress Party-28, BJP-21, Naga People’s Front-4, National People’s Party-4, Ind.-1, TMC-1, Jan Lokshakta-1. Tichuan, BJP ten finrawl thawhin National People’s Party te, Naga People’s Front te huikhawmin BJP chuan sawrkarna a siam leh ta. Nongthombam Biren Singh chu March 15, 2017-ah CM tura lakluh a ni. • Nagaland: Kum 2018 Nagaland inthlanah Kohhranhoten thuchhuahte siamin BJP vote lo turin mipui an infuih nasa. Mahse, BJP hian thiam takin a hmaa BJP leh a thawhpui Nagaland People’s Front chu an kalsan a, a aiah inthlan dawn tepin pawl thar pakhat a lo piang a, chu chu Nationalist Democratic Progressive Party, CM hlui Neiphu Rio hoin an zep lut ta zauh mai. Hetia an tih chhan hi inpho ualau chiam lovin, mipuiin zir chianna an neih an duh lo ni tur a ni, rem hre taka thil ruahmanna a ni. BJP nen nghet taka inthlun zawma an hmatheh turin Naga tualto party ang chiahin inthlanna an bei ta a.  Mipuiin BJP vote angah an in ngai lo, mahse Tualto party NDPP an vote vak khan BJP an vote tih an in hre lo. Result hetiangin: Total 60. Naga People’s Front 26, NDPP 18, BJP 12, NPP 2, Janata Dal 1, Ind 1. Inthlan zawh a nih chuan NDPP nihna dik tak hi  tumahin an ngaihven zui tawh lo, BJP leh NDPP + NPP te chu kut insuihin sawrkarna an siam leh et mai a ni. Naga mipuite hi an bum hlawhtling ti ila a sual lo ang a, lehlamah chuan BJP sum hmathehin a keuh thlu a ni pakhat. • Hetih vel lai tho hian Meghalaya inthlanah Nagaland ang deuh bawkin BJP chu Kristianten an do viau chungin Conrad Sangma pawl, NPP leh NEDA member dangte chuan thiam takin BJP chu an hliah khuh tlat a, an seat lak zat pawh Congress aia tlem hret a ni. Result hetiangin: Total 60. INC-21, NPP-19, UDP-6, BJP-2,PDF-4, HSPDP-2, NCP-1, Ind-3, KHNAM-1. Tichuan, Governor fing taka chein BJP nena inkutsuih tlat NPP (19) leh an thuihruai (UDP-6 te, PDF-4 leh HSDP-2, BJP-2 leh Independent-1) te nen sawrkar an siamna tur kawng a sialsak thlap mai. • Tripura lamah pawh BJP chuan party thar, Indigenous People’s Front of Tripura chu thiam takin a hma theh a, BJP nen thuk taka insiam remin an bei a.  BJP-in seat 35 an la a, IPFT hoten an seat chuh 9 atangin 8 an la bawk a. Communist Party of India (Marxist) kum 1993 atanga lo kal chho chu an titawp ta a ni. Thuchah hnuhnung: BJP hian inthlan hi an phiar uluk thin khawp mai. Mi thiam MBA te, social scientist leh infotech lam mi thiam ruaiin uluk zetin bial tin an zir a, chet dan tur  fing takin an ruahman a. Sum tam tak chhawpin an che a ni.  Chakna tur chiang deuh nia an hriatah chauh BJP candidate tling ngei tura an rin an dah a. Kristian hlangna hmunah erawh chuan BJP a phena awmtirin an hmatheh zawk chu an NEDA member, Tualto party te a ni hlauh thung.  Naga ho leh Meghalaya-ho lah chuan intifuh fein Tualto Party (Regional Party) an vote emaw an ti.  Tin, NEDA member te candidate chu NEDA member dinthuah tir te pawh an awm thei; mahse, dinthuahtu kha tlintir tumin an bei lo va. Tu emaw tana vote kal hlang tur tihpen te, vote kalkhawm lova tihphirsi te, tu emaw tana vote hlang zawnga khalhte an ni thei. Pu Ram Madhav-a MBA chhawr mi thiam rualhovin helai hi chu an chawk chhuak vek tawh ang. A chunga an kalphung zul zui hian Mizorama candidate an rem dan pawh hi fing taka Pu Amit Shah leh Pu Ram Madhav te thluak hmanga ruahman a ang. BJP candidate ni kher lo, NEDA member- MNF emaw NPP tlintir emaw hi BJP tlintir nen thuhmun reng a ni tih hriat reng a pawimawh a ni. “Kan thawkho lo, a hrang kan ni,” tia Meghalaya leh Nagaland mipuite an lo hruaibo ang kha ni ve suh se. MNF leh NPP te hian, “BJP kan thawhpui lo,” tiin pha kual vel mah se an goal chu NEDA team tu emaw ber hmanga sawrkarna lak a ni hrim hrim. Hei hi a chianna chu a tir lama Pu Zoramthanga thusawi kan tarlan leh tun thlenga NEDA atanga an inhnuhdawhna Mizo mipuiten kan la hriat loh vang a ni a. Hetiang hi kan hai der a, chet huna kan chet loh chuan Tualto Party hmanga BJP lalna thlentirtu kan ni mai dawn.  Hetih rual hian, Independent candidate te an tlin palh pawha lei khawm vek thei turin BJP te hian a rukin sum leh pai tam tak nen thang an kam lo vang tih sawi a har hle a ni.