Aizawl: Chief Minister Lal Thanhawla chuan, “Zofate hi khawi rama cheng pawh ni ila, sawrkar min awptute theuh lakah khua leh tui tha kan ni zel tur a ni,” a ti. Miss Zofa International 2018 Grand Finale, Zirtawp zana Mizoram University Auditorium-a buatsaihah he thu hi sawiin Chief Minister chuan, “Kumpinu sawrkarin Zofate hi ram hrang hrangah then darhin, vawiin thlengin khawvel ram hrang hrangah cheng mah ila thlah khat kan nihna leh kan inunauna chhawm nun zel nachang thangtharten an hria hi a lawmawm hle ni,” a ti a. Miss Zofa International Contest chu hnam inpumkhatna lama hmanrua pakhat ni tura buatsaih a nihna angin contestant-te chu inunauna rilru pu reng turin a chah bawk. Chief Minister chuan khawi hmunah pawh awm ila Zofate chu khua leh tui rinawm, mahni intodelh leh hnam tihmingthatu ni vek thei turin a chah a. Mizoram chhunga chengte chu nu leh pa chan changa ram danga Zofa awmte tuamhlawmtu nih tum turin a chah bawk.