• C.Lalhluna,
  Bethlehem
  
• Positive Attitude chu enge? Hrilhfiah dan a in ang lo thei a. Positive Attitude chu mite tlin lohna leh fel lohna lam theihnghilh a, mite tlinna leh thatna lam thlie thiamna/hriatpuina a ni a. A êng zawnga mi dangte dinhmun thlir dan dik hi a kawk turah ngai ila. Rilru put dan dik, rilru sukthlek dan tha a tih theih mai awm e. Hetiang rilru put dan tha hi zofaten kan lo nei rêng em? I han sawi dawn teh ang.

Pi leh pute huna rilru put dan: Mizo pi leh pute khan Positive Attitude an nei tha tâwk kan ti em? Inhnial theih tak a nih ka ring. An nei tha ti lama kan tan chuan a dikna chen pawh a am ang. Chawimawi tlak chu an chawimawi ngam a. Sa leh ralah mi huaisen, fak leh chawimawi phute chu NOPUI an dawmtir thin. An awmdan (attitude) hi a tha hle a tih theih awm e.

Pi leh pute khan Positive Attitude an nei tha kan tih mêk laiin an nei tha tawk lo a ni lawm ni a tih theih ve tho. Hetiang hian lo sawi dawn ila. Kan pi leh pute hunah khan mi chak tak, mi danglam bik an nih dan an lantir that ngam loh chang a awm thin a. Miten ‘ramhuai zawl’-ah an ngai ang tihte an hlau thin a.

Siam danglam bik, mi tihbaiawmah an chhuah mai chuan a pawi dawn hle a. Chuvang chuan an theihna leh chaknate an lantir (show) ngam thin lo niin an sawi. An inthup fo thin a ni awm e.

Mizopa chak hmingthang Thuama (Thuamchaka) chuan, “Mizote chu in chawimawi kan hreh (thiam lo) lutuk a, kei pawh hi ramhuai zawlah min ngai (sawi) thin,” a ti. A rilru a na hle a ni awm e. A ni taka, tlangval thenkhatte pawhin itsikna avangin nula thenkhatte chu ‘phungzawlah’ an chhuah (puh) thin.

‘Khawhring a nei’ an ti bawk thin. Hetiang hi nulate dinhmun anih avangin an nun a chep êm êm a. An duh loh leh an ngei ruk êm êm tlangvalte pawh an be chhe ngam ngai lo. An tihmualpho an hlau thin. Chuvang chuan nulate nun hi a chep êm êm a ni. Heta kan tar lan tak atang hian Positive Attitude kan nei tha tawk lo a tih ve theih tho awm e.

Tunlai hunah ve thung: Mi thenkhat chuan tunlaia zofate aawm dante hi kan duh khawp lo hlê a. Kan that lohna lai kan sawi chiam chiam thin. Zofate hi kan sawi sual vak vakte pawh hi a fuh ber lo mai thei a. Kan khawtlang nun leh chhuangkaw zeiziate pawh hi fakna tur tam tak a awm a. Tunlai hian mi chawimawi pawh kan uar hlê a. Zai lama inelnaa ti tha te, fiamthu thawhna lama ti tha te, HSLC & HSSLC, competitive exam-naa hlawhtlinna neite leh State, National, International-a che thate kan chawimawi thin. A lawmawm e. In chawmawi duhna rilru kan pu hi a lawmawm hlê mai. Positive Attitude kan nei tak zet a ni a tih theih hial ang. Amaherawhchu, hetiang dinhmuna kan mek lai hian kawng leh lamah chuan hmasawnna tur kan nei hlê a hriat a ni. Mite vanneihna leh hlawhtlinnaah thinlung takin kan lawmpui thiam tawk lo emaw chu aw a tih theih a. Mite’n vannneihna an dawn a, sum lakna thianghlim hmang pawh kan sawi hnawm a. An hriat lohah tehna chi hrang hrang kan lo hmang a. ‘Mah reng reng se,’ tih rilru kan pu tlat thin.

A bik takin tunlai khawvêlah hian Kohhran hruaitu leh sawrkar hotuten beih an tawk nasa ber a. Mi fak leh chawimawina lam aiin rêlna/sawisêlna lam kan uar mah mah niin a lang. Kan thil hmuh leh hriatte, ngaihtuahna zawng zawng sawi sawite hi a him ber lo fo. Kan zalenna kan hmang thiam tâwk lo niin a lang.

Facebook, Whatsapp awm hnuah phei hi chuan mi tinten editor hna thawh kan tum a ni ta ber a. Thu dik pawh hriat chian har châng a awm thin. Upa Lalthankima (RIP) Dawrpui Vengthar chuan, “In fate hriatah Upate rêl reng reng suh u. Min sawisel vak chuan infaten min hmu tui lo vang a, kan thusawi an ngaithla tha duh lo vang a, nangmahnin in tuar ang,” a ti. He thu hi a dik hlê a ni. Upa te, Pastorte, zirtirtute hi min zirtirtute an ni a, thawhpui thiam a tha êm a ni. Chutiangin ram hruaitute pawh Pathian ruatte an ni a, thawhpui thiam a tha hlê.

Shakespear-a’n, “I hmelma hliau nan meipui i hman chuan nangmah pawh i kang tel ve thei,” a tih hi a dik hlê. Pathian mi Sadraka te, Mesaka te, Abednagoa temeipuia paihthlatute kha an kang tel ve a nih kha. Mi kan rel leh sawisel vak vakte hian kan hriat loh laiin kan lo tuar thei, kan kang ve thei tih hria ila. Mi fak ngam khawpin huaisen ila a va tha êm!

Tlangkawmna: Zofate hian Positive Attitude kan nei a, chawimawi phu kan chawimawi ngam a, thil dik lo titute kan malmak/endawng ngam chuan he ram hi a nuam ang a, hma a sawm ngei ang le.