Aizawl: Zokhawthar hmuna India leh Myanmar insumdawntawnna chu bungrua eng emaw zatah kalpui mek ni tawh mah se dan anga taka kalpui tur chuan thuam that a la ngai hle a, hei vang hian anih tur ang takin a la kal thei lo. Zalen palai thudawn danin Zokhawthar Land Custom Station-ah hian insumdawntawnna kalpui tak tak tur chuan ram dang pawisa thlengna tur hmun te, dak in, inbiakpawhna hmun tha, ei tur thianghlim leh thianghlim loh enna (food testing laboratory), bungraw dahkhawmna in leh lirthei thil phurh rihzawng hriatna tur (weight bridge) te a la awm lo a ni. Insumdawntawnna atana dah ngai te hi sawrkar laipuiin a la tih hlawhtlin loh bakah Myanmar lam pawhin insumdawntawnna tura a hlenchhuah tur peng hrang hrang tihpuitlin loh a la ngah hle bawk. Hei bakah hian kawng chhe lutuk chuan harsatna a siam bawk a, Champhai-Zokhawthar kawng hi tun lai hian laih mek a ni. Zokhawthara insumdawntawnnaah hian India ram atangin sam, la leh leitha te chu Myanmar lama lut langsar zual te an ni a; Myanmar atang hian ni tin eichawp, kuhva, secondhand leh inchhung hmanrua chi hrang hrangte chu lo lut langsar zual an ni tih Custom thawktute chuan Zalen an hrilh. Bungruate hi Tiau leiah tawlailir hmangin phurh kai thin an ni. Zokhawthara insumdawntawnna hi kum 1995 a Indo-Myanmar Border Trade Point Tamu-Moreh nena hawn rual kha a niin kum 2015 atangin Barter System chu Normal Trade a kalpui a ni a. A hmaa bungraw 64-ah insumdawnna kalpui tur tih chu tun hnai khan item 74-ah tihpun a ni. Thudawn danin sawrkar laipuiin bungraw lakluh thenkhata chhiah Basic Custom duty 40% zet a lak vangin sumdawng thenkhat chuan harsatna an tawk tih an sawi a. Hei bakah hian India leh Myanmar a sumdawng lian thenkhat inthurualin bungraw kal vel hi an thunun nia an hriat avangin Export & Import of Mizoram (EXIM) chuan sumdawnnaah hian hlawkna an neih ve theih nan hma an la mek a, chanvo eng emaw zat chu an nei ve tawh nia thudawn a ni. Myanmar nena insumdawntawnna kalpui a nih avang hian Champhai leh a chhehvelah kudam a pung chak hle a, bungruaw phur tur hnam dang motor (truck) pawh a tam thei hle.