Zonet Director-in 'Two Wheeler Taxi Driver' a tlangzarh
![](https://zalen.s3.ap-south-1.amazonaws.com/images/news/1707551491_teber.jpg)
Zote Entertainment film thar 'Two Wheeler Taxi Driver' chu Zonet Director Lalnunpuia (Mapuia) chuan Zirtawpni zan khan Vanpa Hall-ah a tlangzarh. Mapuia chuan thusawiin, film siamtute leh changtute chu larna leh sum leh pai ringawt um lo turin a chah. Mizo film industry-in hm a sawn tih sawiin, film siam hnem ringawt tum lo a, uluk leh belhchian dawl tak chauh tichhuak turin a fuih bawk.
Zote Entertainment te chu an thawhrimna leh taimakna avanga Mizo Film Award 2023-a 'Best Film' award la thei an nih thu sawiin, rim leh taima taka thawk zel turin a chah bawk a ni.
Taxi Driver chu...
'Two Wheeler Taxi Driver' hi Zote Entertainment film siam tawhah chuan budget sang ber a ni a, en pawh a man hla hle. An film siama hman tur liau liau hian scooter thar hlak Dio 125 (smart) an lei a, film-ah hian an vaw chhe hle a nih kha. A changtu pa Vanlalhmangaiha chuan, "Film atana lei ni mah se hun eng emaw chen kan lo inchul nel tawh avangin vuak chhiat a ni kha ka ui hle a, ka hnuk a ulh lek lek a ni. An vuak chhiat lai khan ka lo va inrawlh pek a, kut tum tum hnih ka dawn phah nghe nghe," tiin a sawi.
A thawnthu
Two Wheeler Taxi Driver-ah hian thian dunin harsatna leh buaina an hmachhawn dan leh chumiin an nunphung a thlak chhoh dan tarlan a ni. Sumin mihring a tih at theih zia pawh pholan a ni a, romance, action, crime leh comedy hmuh tur a awm vek ti ila kan sawi sual awm lo e.
A changtute
Mizo Film Award 2023 Best Actor nominee zinga mi Vanlalhmangaiha chu a changtupa a ni a, a thiam zia kan hmu leh ta. Hmangaiha chanpui hi Serchhip nula Malsawmsangi a ni a, film lamah a mikhual tawh lo. An chang thiam a, en man hla tak a ni. Anni bakah hian Zote Entertainment Board of Directors zinga mi Aaron Malsawmdawngzuala a rawn inlan ve leh bawk a, acting a thiam zia a rawn pholang chiang hle. 'Amawii' film-a chang thiam zet mai Maneihi Fanai pawh a thiam ngaiin a la thiam reng e.
'Two Wheeler Taxi Driver' hi Lersia Play-ah en theihin a awm a ni.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024