Aizawl April 18, 2023 : Zonet-in April ni 15 (Inrinni 7:00pm) chanchinthar-a zu zawrh thlâwptute zinga kohhran rawngbawltute an tel nia an puan chu chiang taka puang turin Chief Minister, MNF President ni bawk Zoramthanga chuan a phut.

Mizo Hnam Run inkhawma thu a sawinaah Zoramthanga chuan zu khapna dan, ‘The Mizoram Liquor Prohibition Act 2019’ Zonet-in an zirchiannaah ‘Zu zawrh thlâwptute zingah sawrkar hnathawk, Kohhran rawngbawltu leh khawtlang hruaitu engemawzat an tel nia a puan chu mak a tih thu a sawi.

MNF President chuan Zonet hian zu zawrh thlâwpna lam thu chanchhinthar ‘headline’ meuhah  hmangin zu zawrh leh a nih theihna tur lam hawiin a zir chiangtu tur an intir niin a lang thei a. Zu chu zawrh a nih leh theihna tura khalh luh tumna leh hetiang hmalakna an rawn chhawpchhuak hi pawi a tih thu a sawi a, "Kohhran rawngbawltute sawi lan a ni phei hi chu a pawi takzet a ni," a ti. 

Zoramthanga chuan, “Zonet hian tute nge an contact tih engmah an sawi lang lo a, Excise Department-a thawktu pakhat sawi dan tih te, mi thenkhat sawi dan tih te bakah, kohhran hruaitute zînga miin zu zawrh leh chu tha an ti, ni tein a puang a, hei hi MNF chuan kan ngai thutak hle a ni,” a ti bawk.

MNF President chuan, "Presbyterian kohhran hruaitute hian zu zawrh leh hi tha an ti dawn em ni?, Mizoram Baptist kohhran leh kohhran dang hruaitute hian zu zawrh hi tha an ti dawn em ni? MNF chuan zu zawrh leh hi tha kan ti lo a, zu zawrh chhûnga dik lo tak leh dan pangngailo taka thihna a thlen tamzia te kan hmufiah tawh. Kan tawrhna kha rapthlak kan ti a, mihring nunna thâp tur leh chhungkaw kerhdarhna thlen turin zu hi zawrh nawn leh chi-ah kan ruat lo," tiin Zu zawrh tha a tih loh thu a sawi.