Aizawl March 23, 2023:  Zoram Medical College (ZMC) building sak thara ruahsur avanga tui a put leh a far chu Mizoram Pradesh Youth Congress Committee (MPYCC) chuan pawi an tih thu an tarlang a, a rang thei ang bera siamtha turin thuneitute an phut.

MPYCC chuan ram rohlu Medical College chu uluk leh tha taka enkawl turin Mizoram Sawrkar an phut. "Harsatna tam tak sutlanga Congress Sawrkar-in a lo din, MIMER (Mizoram Institute of Medical Education and Research) damdawi in lian hi kan ram tana a hlutzia leh a tangkai zia chu a takin a lang zel. MNF Sawrkar hian Covid 19 hripui kha MIMER hi awm ta lo se a mualpho phah nasa dawn hle a, hripui kan tawrh laia kan innghahna damdawi in chu MIMER hi tih Zoram mipuite hriatah kan puang thar leh a ni," an ti.