Tun hnai mai khan South Korea atangin kan ramah palai an lo zin a, kawng tam taka kan khawsak phung a in an thu an sawi uar hle a. Tunah hian Taiwan palai an cham ve leh mek a. Heng mite hi lo zin satliah an ni lo a, ram hruaitute'n thawhhona tha zawk an beisei avanga lo zin an ni a, kawng tam takah min puih an tum thu an sawi hial a. Hma thlir neia kan ram hruaitute hmalakna hi a lawmawm hle a, tunah hrih chuan la lang chhuak chiah lo mah se mipui-ah beiseina sang tak a siam a ni. Korean palai lo zin te kha sawrkarah pawh aw nei pha chin an ni a, a then phei chu mithiam puitling tak tak te an ni. Korean hote’n an ram leh kan ram a in ang hle nin an sawi a, phai aiin tlangram an ngah a, sik leh sa inang thlap thlap lo mah se inthlau erawh an ni lo thung. Korean palai te chu Korean serial lehlin tualchhung cable TV a chhuah thin thu leh Mizote’n an en nasat thu hrilh an nih khan an rilru a hnehin an lawm hle niin a lang a, media lamah pawh a lang hial a ni. Ei leh inah pawh a tam zawk duhdan a inmil hle bawk a ni. Sakhuana ah pawh Kristian tam zawkna ram an ni a, heng zawng zawng avang hian tih takna nen rilru a inpawh viau a; an chet zel danin a hril bawk turah ngai ila a tha hrih mai awm e. Taiwan palai pawhin Mizo te pui a inhuam thu a sawi hi kan ram hruaitute hian bawhzui zel se a tha ang. Hetiang tho hian South East Asia lamah hian ram hausa tak tak an la awm a; kawm ngeiha Zofate tana belh tlak ni tura hma kan lak zel a pawimawh ang. Khawchhak ram kan tihte hi a then chu thiamnaah pawh sang tak tak khawvel huapa lawr pha an ni a; an sumdawnna in khawvel a dapchhuak hial a, ram kilkhawr, keini ang ramah pawh an kutchhuak a tlan suau suau reng a ni. Hemi piah lamah hian thlai chin dan tangkai zawk, buh thar chhuah tam zawk leh helam kaihhnawih tam takah zira hlawkpui tur a awm nual ang. Thiamna lamah zirlai, inchhung bungraw pawimawh, lirthei leh thil dangte tiamin an hnen atang hian thiamna lakchhuah tur tam tak a awm ang a. Hemi hian intodelh kawngah Zoram chu engngemaw chen a hruai thei mahna. Prime Minister Narendra Modi an CM a nih laia Gujarat hma a sawn pui dan kha a hahdam hmel zek a. Ram chhung leh ram pawna company lian te chu an state ah ko lutin an bungraw siamchhuah nan hmun a hman tira, sawrkar hmalakna tam tak chu company a enkawl tir a. Heng atang hian sum tam tak a lut a; sawrkar hnathawk chuan thawk lo mahse hlawh a lak tho laiin private kutah chuan thawh that loh chuan sawrkarin midang a pe mai dawn a, hna a tha duh a ni. PM Modi pawhin India state tinte chu thawhpui zawng turin a fuih tawh nghe nghe. Ram rethei te chawi kan tum ram hausa tak tak an awm nual tawh a, heng hi kan ram hruaitute hian dap chhuakin kawm ngeih tum hram hram sela hmasawnna a awm thei mahna. Hetih rualin ram hausa zingah khawthlang ramte tangkai hle mah se an khawvel a dan(g) hlawk avangin kan ram mamawh an hrethiam lo thei a; hmel leh pianziaah inanna a awm lo bawk a, rilru taka inpawh a har phah thei awm e. Heng rama palai te hi lo zin thin mahse chhenfak pui tham erawh a ni lem lo a, a pawnlawi deuhin a lang thei a ni. Kan ram hruaitute hian khawchhak ramin hma an sawn dan leh an thiamna lakchhuah dan ngaihtuah zel sela. Hemi piah lamah kan thil tharchhuah thawnchhuaha lei tur hialin inlaichina a siam theih hmel a, a dang pawh a la awm thei nual anga, a ngaihna leh remhriatna nen bawhzui chhunzawm zel sela Mizoram hian a hlawkpui ngei ang.