Aizawl; Zirtawpnia Hotel Curry Pot-a MPC Gen. Hqrs. thalai Executive Meeting, MPC thalai President V Lalthazuala hova thukhawm chuan Mizoram Congress sorkar Mizoram thendarh a nih hma ngeia an lal thutthleng kiansan turin an phut. MPC thalai hruaitute hian tunlai Politics kal vel hrang hrangte thlirhona an nei a, a bikin Chakma chungchanga sorkar hmalakna an sawiho a. Mizoram leh Mizo hnam himna tura Mizoram tlawmngai pawl hrang hrang ten uluk tak leh thahnemngai taka hmalakna an lakna tihzuzi tumlui tlatah Home Minister puhin, vanduaithlak an tih thu an sawi a. Mizoram leh hnam thendarh tuma hma latu langsar tak Minister of State Dr. BD Chakma bang tura nawrna pawh tun thlenga sorkar hmalakna la awm lo leh a humhim zawnga hma a la lui tlat nia sawiin, mak an tih thu an tarlang bawk. Hetiang boruakin Mizoram a luah mek laia STEE CAT-I ah Mizo fate chanpual ngeia mikhual Chakma 38 ngawt sorkarin a telh lui niin an sawi a. Hei hi Zoram mipuite zahlohna vawrtawp leh tlawmngai pawlte leh zirlai pawlte runluihna leh elsenna rapthlak takah MPC thalai chuan ngai tih an sawi. Mizoram sorkar, Lalthanhawla kaihhruaina hnuaiah Zoram hi him lo hle-ah an ngai tih sawiin, Mizoram thensawm a nih hma ngeia an lal thutthleng kiansana bang turin Congress sorkar chu an phut tih nimina MPC thalai thuchhuah chuan a tarlang bawk.