Aizawl October 3, 2022 : Mizo Hnam Run chhung inkhawm neih-ah MNF Adviser, Dr.R.Lalthangliana chuan, Mizorama political party dang hruaitute chu an chanchin sawi tur a hriat loh thu a sawi a, zu far khat pawh tem chhin ve lo tawngtaia Pathian rawn sem mi, leadership nei tha Zoramthanga an nei chu an vannei bik thu leh a kaihhruaina an ring tawk tih a sawi. 

Dr. R. Lathangliana chuan MNF chu Pathian leh kan ram tan tih thupuia hmangtu an nih thu a, kal dan mumal taka kal a nih thu te a sawi a. Mizo national tobul a nih thu a sawi. MNF chuan hruaitu tha an nei tih sawiin, "Mizorama political party dang hruaitute chu an chanchin sawi turin ka hre ve lo a. Mahse, MNF chuan Pu Zoramthanga hruaitu tha kan nei hi kan vannei bik hle a ni. Vanduaithlak takin Pu Denga'n kum1990-ah min boral san hnuah, zu far khat pawh la tem chhin ve lo, tawngtaia Pathian rawn zel mi, leadership nei tha bik Pu Zoramthanga'n min hruai a, a kaihhruaina hi kan ring tawk a ni. He Mizo kristian rama roreltute hi Pathian ruat ngei an ni tih kan hriat a pawimawh a. Sawrkarna siam chuan mihring mai kan nih avangin, tuten emaw kan tihsual palh changa min ker ngar ngar chuan kan hriat miah loha kan tihsual palh te, lo dai sual zeuh te chu a awm thei ang, heng mai maiah hian buai thin lo ang u. Kan sawrkar leh sawrkar loh innghahna chu kan thil tih leh awm danin a zir a ngai a, hnam party kan nihna hi chapo pui mai lovin, a takin nun pui zel ang u," a ti bawk.

Health Minister Dr. R.Lalthangliana chuan, "Kum 3 leh thla 10 kan sawrkar chhung hian hripui leng bakah vawk pulh hri, lirnghing, kan unaute raltlan lo dawnsawn leh harsatna tam tak kan tawk a. Health bik chuan Covid do kengkawhin, sawrkar department zawng zawng, NGO, Kohhran, mimal leh chhungkua thlengin kan thawhhona tha tak kha Pathianin mal min sawm a ni. Heng harsatna te hi tawng lo i la, kan chief minister zahawm tak pawhin tan a la nasa a, thil ropui tak tak a lo thleng tam tawh ngei ang. Hripui leng kha khawvel ram ropui ber leh thil ti thei ber pawh an mualpho nasa a, India ram state tinten harsatna kan tawk a ni. SEDP kan duan lai khan harsatna lo thleng tur hi kan hre lawk si lo a, thenkhatin, 'an sawi angin an ti leh si lo' tih hi a awm fo a, kan harsatna tawh kha khawvelin min hriatpui a ni. Hripui leng tur kha tumahin kan hre lawk lo a, budget-ah hripui leng dona kan dah lo a ni. Heti chung hian CM leh Minister/MLA-ten sawi sen loh tam tak hna kan thawk a ni," a ti.

Health Minister chuan, "Kan sorkar tirh khan Aizawl Civil Hospital-ah hian ICU 5 chauh awm kha covid hrileng karah 15 kan dah belh nghal a, 10 dang kan dah belh thuai dawn bawk a ni. Kum 2006 kan sawrkar laia 5 kan dah kha Congress sawrkar kum 10 khan an ring char char a ni. Trauma Centre te, Lung thlakna te hripui lengkarah kan dah bawk," a ti. Zemabawk-a Cancer Supecialiy Hospital leh RIPAN-a sum an sawi chhuah thawh mek a nih thu leh MNF chuan sawrkar hmasate hmalakna an chhunzawm zel a, District thar fuke kima an tihpuitlin thu te a sawi bawk.