ZALEN August 20, 2026 : MNF President Zoramthanga, Chief Minister hlui chuan vawiin chawhnu dar 2:30 khan ama puala hun buatsaih, Special Lecture-Cum Interactive Programme chu Gauhati University, Phanidhar Dutta Seminar Hall-ah khuallian niin a hmanpui.

Chief Minnister hlui Zoramthanga chuan a puala hun ropui leh chhinchhiahtlak tak buatsaihtute chungah thinlung taka lawmthu sawiin, "Ka tan mellung pawimawh, ka hriatreng tur leh ngaihhlut berte zinga mi a ni," a ti.

MNF President Zoramthanga hi kum 1966-a Gauhati University hnuaia awm thin D.M (Dhanamanjuri) College, Imphal aṭanga Bachelor of Arts a lo pass tawhna Certificate chu Gauhati University chuan an hlan a. Zoramthanga hian D.M College aṭang hian English Major lain final year a exam zawhah ram leh hnam tan zalenna suala Laldenga kaihhruai MNF movement a zawm tak avang leh inremna awm hnuah pawh politics ah a hun pum a hman zui tak avanga B.A Degree Certificate a lak ve tak loh chu vawiin hian hlan a ni ta a ni.

MNF President Zoramthanga hun hmanna programme thupui hi "From Guerrilla Fighter to a Peacemaker by Shri Zoramthanga" tih niin, tun hnaia a lehkhabu ziah, "From Guerrilla Fighter To Chief Minister" tih, Penguin Random House India tihchhuah behchhan leh Zoramthanga hringnun zinkawng behchhana buatsaih a ni a. He hun hi The Gauhati University Institute of North East India Studies (GUINEIS) leh Omeo Kumar Das Institute of Social Change and Development (OKDISCD) buatsaih niin, University zirtirtute leh zirlai sang rualte nen hun hman a ni.

Certificate hlanna neih zawh hian Special Lecture-Cum Interactive Programme neih zui niin Gauhati University zirtirtute leh zirlaite nen zawhna leh chhanna hun neih zui a ni bawk.

He hun chhinchhiahtlak tak Special Lecture-Cum Interactive Programme hi Hon'ble Vice Chancellor Prof. Nani Gopal Mahanta chuan a hawng a. Hon'ble Chairperson, OKDISCD Shri Subhash Chandra Das, I.A.S (Rtd.) chu Guest of Honour a ni.

MNF President Zoramthangai Dr. R. Lalthangliana, MLA; MNF Sr. Vice President chuan ṭawiawmin thusawina hun an hmang ve bawk. MNF President hi MNF GHQ hruaitu ṭhenkhat leh MNYF Headquarters hruaituten an ṭawiawm bawk.