Aizawl March 17, 2023 : ZORO Executive Committee hnuaia Refugee Committee te chuan vawiin khan Aizawl Press Club-ah chanchinthat lakhawmtute an hmachhawn a, raltlante dinhmun a tha lo hle niin an sawi a, chhuanchham te pawhin an awm hman tih an sawi a, Mizoram mipuite raltlante tana penchhuak turin an ngen a, an tan Vehbur khawnsak an tum. 

ZORO chuan Raltlanten hi kum 2 dawn an awm tawh a, puitu an hmu meuh tawh lo an ti a, sawrkarin a puih loh chuan chaw nghe mai thei dinhmunah an ding an ti a, sawrkar leh YMA lama atanga puihna a tlakhniam a, an mamawh lah a ngai reng a nih bawk si avangin an mangan thu an sawi a, tunah hian Vehbur khawn turin hma an lak mek thu an sawi bawk. 

ZORO Refugee Committee  chuan Raltlan hmasa ber te chu March 2021 khan an rawn lut tiin vawiin thlengin an la pung zel tih an sawi a, engmah neilo a tlan an nih avangin eibar hi an mamawh hmasa ber a ni, an ti. Rem leh rem lova lo lut an nih avangin ramri bula awmzui nghal an awm laiin thenkhatte chu hmun hla tak tak an pan an ti.

Raltlante hian khaw te an belh thin avangin an tan eizawnna a harsa an ni a, chawmhlawm reng awm duh lo mah se, hnathawh tur a awm si loh avangin an tan khawsak a harsa hle niin an sawi. An chenna te chu Silpauline leh Di a sak te a nih avangin fur-ah chuan chenna tlak a nih dawn lo tiin, chenna tur tha ngaihtuah sak a, hnathawk theia siam chu a pawimawh hle an ti. 

Raltlante hi mi nausen atanga kum upa tawh tak te an nih avangin hriselna lamah pawh harsatna an tawk tih an sawi a, damdawiin lama inenkawlna an mamawh hle, an ti. Zirna lamah pawh harsatna an nei a, naupang tam tak chu an zirna a bahlah an ti bawk. ZORO te chuan heng raltlan naupangte hi mid-day meal pek theih an duh a, ei tha an ei loh avangin an hriselna pawhin a tuar hle niin an sawi. 

ZORO Refugee Committee te chuan Refugee Card nei te chu Ration Card pawl ang chi nei ve se an duhpui a, Refugee status India sawrkar hnuaia nei thei tura bawhzui tha an ti a, India ram chhuahsan thei se an khawsa a ziaawm an an ring bawk a ni.