Mizo Film Award 2023-a 'Best Film' award latu Zote Entertainent chuan film thar tur an buaipui leh mek. An film thar tur hi 'Two Wheeler Taxi Driver' tih a ni a, shooting an nei mek. 

'Two Wheeler Taxi Driver' hi Zote Entertainment film siam tawhah chuan budget sang ber tur a ni dawn a, en chakawm tawh tak a ni. An film siama hman tur liau liau hian scooter thar hlak Dio 125 (smart) an lei a, film-ah hian an tichhe vek dawn nghe nghe a ni! Shooting hi November 10, 2023 atang khan an tan a, tunah hian shooting hi ngawrh taka neih chhoh mek a ni.

Zote Entertainment hian Mizo Film Award sem zawh takah khan an kut chhuak 'Amawii' hmangin Best Film Award an dawng a, hei hian phurna nasa tak a pek belh ngeiin a rinawm. An director Mike-a chuan tum danga an film that tawk loh thin nia an sawi, a tawp (ending) pawh uluk leh zual a nih thu leh picture leh sound lamah theih tawpa hmasawn tumin tan an lak thu a sawi a ni. 

A thawnthu

Two Wheeler Taxi Driver-ah hian thian dunin harsatna leh buaina an hma chhawn dan leh chumiin an nunphung a thlak chhauh dan tarlan a ni. Sumin mihring a tih at theih ziate pholan a nih dawn bakah, tum danga an film kalphung ang lo takin - romance, action, crime leh comedy lam a rawn inpawlh nuk dawn a ni.

A changtu tur lam...

Mizo Film Award 2023 Best Actor nominee zinga mi Vanlalhmangaiha chu a changtupa a ni leh dawn a, 'Ka U Liana' film-ah hneh sawh takin a lo inlan tawh a ni kha - a en tawhte chuan a thiam zia kan hre theuh awm e. Tun tumah hian a hming tak Hmangaiha angin a rawn inlan dawn a ni.

Hmangaiha chanpui tur hi Serchhip nula Malsawmsangi a ni a, film lamah a mikhual tawh lo. 'Rose' film-ah khan a lo inlan tawh a, tun tumah hian Nutei angin a rawn inlan dawn a ni - film lamah chuan Hmangaiha nen tawn hriat an neih dan a inang tawk viau. 

Anni bakah hian Zote Entertainment Board of Directors zinga mi leh an scriptwriter ni bawk Aaron Malsawmdawngzuala a rawn inlan ve leh dawn bawk a, acting a thiam zia chu - Amawii leh Thaibawih ahte a lo pholang tawh a ni.  

'Amawii' film-a chang thiam zet mai Maneihi Fanai pawh kan hmu leh dawn a, Mizo film industry-a sulhnu ngah tak Numachhungi leh 'Dear Kim' film-a a changtupa Isaac Chawngthu te an la awm cheu bawk. 

Buatsaihtu lam

An film hrang hrang siamtu Mike-a chu 'Two Wheeler Taxi Driver' ah pawh director a ni leh dawn a, tun tumah an script hi ama kut chhuak a ni bawk. Aruata Fanai chu Asst. Director a ni a, Ruattea Photography chu Director of Photography niin, executive producer hi Mawimawii a ni thung. He film-ah hian Mizo clothing brand Traditional Twist (TT ARTS) bakah, thawhpui hrang hrang - Aries Boutique, Sarah Touch, Zta Khawlhring, Westend Studio, Aricky Sailo te an nei bawk a ni. 

Shooting hi Aizawl leh Ailawng-ahte neih tura ruahman a ni a, nakkum kumtir lamah tihchhuah tum a ni.