ZALEN May 14, 2026: Thawhlehni kalta zan dar 8 vel khan Champhai Zote khawtlang leh 14th Assam Rifles te inkarah inhmuh thiamlohna a thleng a. AR te hi insawn tura khawtlangin an phut vangin nizan khan an awmna atangin an insuan chhuak nia thudawn a ni.

ZALEN thudawn danin nizan hmasa dar 8 vel khan Champhai Zote leh Ngur khaw inkara duty 14th Assam Rifles duty, uniform inbel lo, silai leh chem keng te chuan Zote VC member Vanlalhruaia Sailo leh Lalhriatrenga te ram kal hawng lam chu lo manin an phuar bet a. Vanlalhruaia Sailo hi kut thlak zuiin a lû ah hliam tenau a tuar a, hetih lai hian Lalhriatrenga chuan an khaw VC Secretary Lalmuanawma hnenah harsatna an tawh dan te mobile phone hmangin a hrilh a, Zote khawtlang thinrim chu buaina chhuahna hmun lam panin an kal a. Boruak chhe zawk a thlen hmain khawtlang hruaituten mipui an khap bet thei a ni. 

He thil thleng avang hian Zote mipui chuan an khaw kiang lawka 14th Assam Rifles in duty post an neih mek chu thiat tur leh he hmun hi chhuahsan nghal turin an phut a. Zote khawtlangin an phutna angin 14th Assam Rifles te hian nizan atangin an bungrua leh thil pawimawhte an thiar chhuak nghal a, duty post building leh puanin te erawh chu Champhai Police ten an veng zui thung.