ZALEN November 25, 2024 : ZPM General Headquarters chuan vawiin khan Party Office-ah chhung inkhawm an hmang a, LAD Minister C. Lalsawivunga chuan, Mizoram Sawrkarin Village Council term pawh tawi anih chhan chu state sum leh pai fimkhur tak leh daihzai taka hman duhna vang leh Covid vanga VC term pawhsei tak her remna tur a nih thu a sawi.

LAD Minister chuan, “Village Council inthlan hun hi tihtawi a ni a, a chhan lian ber pakhat chu kan state sum leh pai fimkhur tak leh daihzai taka enkawl leh hman a tul vang a ni. 15th Finance Commission in recomendation a siam angin state-in ke a pen chho zel. Post Devolution Revenue Deficit (PDRD) Grant kan dawn dan tur pawh mumal takin siam a ni a. 2023-ah khan Vbc 122.83 kan hmu a, 2024-2025-ah Vbc 89.91 thla tinin kan dawng thung a ni. Nakkum-ah chuan Vbc 48.83 hi thlatin kan sum hmuh tur a ni a, hetiang hi 15th Finance Commission in a recomendation siam dan a ni a, kum tinin state sum hmuh tur hi a hniam zawngin a kal zel a ni."

"Tin, thil man hi kum tin a sang chho zel a, chuvangin thiam tak leh fimkhur taka sum leh pai hman a ngai a, chutiang karah chuan kumtharah VC leh LC inthlan neih a ngaih dawn bakah kum tawpah LADC inthlante kan hmachhawn leh dawn a, 2026 kumtir lamah AMC inthlan buatsaih a ngai bawk a, state dinhmun ngun taka kan thlirin nakkumah inthlan pawimawh tak tak hmachhawn tur kan nei a ni. Chuvangin Sawrkar chuan mipui nghawng lo thei ang bera inthlanna kalpui turin ruahmanna siam a tum a, kum 2020 ah khawvelin hripui (Covid 19) kan hmachhawn avangin VC term pawhsei a ni a, tunah erawh Covid 19 a lo reh tak avangin VC inthlan hun siamrem turin Sawrkarin ruahmanna a siam ta a ni,” a ti. 

Minister chuan, “ Eng anga nasa pawhin min beisei mah se, party mipui kan nghing lova, sawrkar a nghing hek lo. Ram rorelnaah Pathian ram tundin hi kan tum ber a nih miau avangin hetah hian kan ding nghet a, kum tam tak chhunga an tih theih loh kha keini chuan Pathian chakna ringin kum khat pawh tling lovah kan ti chho mawlh mawlh mek a ni. Nasa takin kan sawrkar hma atangin party pahnihten min beih rawn a, ZPM sawisel kha an manifesto emaw tih tur khawpin sawi tur dang an hre lo. BJP Party nena thawkdun angtein vawiin thlengin min la sawi a, kan leader Pu Lalduhoma leh Pu K.Sapdanga karah hemthlak tumin nasa takin an bei a, eng anga tha pawhin thawk mah ila min sawisel kha an hna ber a nih miau avangin mipuite hian ngaihdan chin tawk an nei tawh a ni,” a ti bawk.