ZALEN August 21, 2026 : Mizoram Pradesh Congress Committee chuan vawiin khan Political Session an nei a, he hunah hian Lal Thanzara, President, MPCC chuan MPCC a mawhphurhna neitute tunhnaiah insiam tharin, an insiamṭha a. Hei hian Zoram puma Congress party mipui te a tilawmin an phur phah niin a hria a, lawmawm a tih thu a sawi.

Lal Thanzara chuan Politics avanga nihna neihte chu intih milenna, intihlarna leh intihhausakna chi a ni lova. Chhiahhlawh hna, thuhnuairawlh leh inngaitlawma Bible-in a tarlan angin Nazareth Manifesto rethei avanga saltang te chhuah a, duhamna avanga mitdelte tivar a, mi thiltithei ten an rahbehna atanga tichhuak tura ke pen tur nih inhriat a ngai a ti.

Congress president chuan an elpui party te chu BJP hlau em em, inthlan laia BJP sum tam tak lo hmang tawh tute niin BJP tih lawmloh hlau reng rengin an kal mek a ti a, an opposition pui MNF te hi an hotupa in BJP note an nihzia leh a bultumtu an nihzia chu hmanni lawkah pawh a sawi chungchang chanchinbu-ah hmuh tur a awm tih a sawi.

"BJP peng te nih leh BJP hlau reng reng te hian kan ram tan malsawmna an thlen ka ring lo. A chhan chu BJP te chu India atanga Kristian te nuaibo tumtu te, India danpuia secular nuai bo a, chanchintha hriltute tiduhdahtu te, Hindu lal rama India siam tumtu te, zirlai pawisawi lo nghaisatu te, India mihausa tawntaw te vulh ngar ngara mipui vantlang chan aia vulhtu an ni a, FCRA hmanga kohhran leh hnam hnufualte hamthatna tihdanglam tumtute an ni," a ti.

Ni 100 inhlawhna an pawngsuala, vai pathian hming lam ziahin inhlawhna min siam a. Tun hnaiah vai pathian fakna 'vande mataram' min sak luihtir an tum bawk a ti.

Lal Thanzara chuan, "ZPM chhungah intentawnna ni lovin, inteitetna an zingah a thleng mek niin a lang a. CMO-ah Adviser te aiin pension rawih nawn leh pakhat chu a thu zawk avangin an pheikhai a rual thei lo niin an sawi. An term an hman zawh hram hi i duhsakpui ila. Sawhthing man an ba te hi pe zo phawt se, banakaih te hi thalai tam takin chhawr phawt se chumi hma chuan la inpumkhat hram hram se a duhawm a ni," a ti.

India ram pumah Congress kaihhruai opposition a lian mek tiin, kum 2029 Lok Sabha inthlanah chuan India ramah Congress kaihhruai sawrkar a din ngei a rinawm a, Rahul Gandhi a Prime Minister ngei tura rinkai ber a ni, a ti.

Lal Thanzara chuan College leh University mithiam te, NGO a inhmang mi tha tak tak te, thalai fel leh duhawm tak tak te, kan ram thatna duhtute, kan ram tungdinga siam tha leh tura lo penchhuaka Congress a awm turin a sawm bawk.