Aizawl March 31, 2023 : Vawiin Mizo Hnam Runah chhung inkhawma thusawitu MNF Gen. Hqrs Adviser Lalruatkima chuan Insawisel ringawtin ram a siam tha dawn lo a ti a, ZPM chu Thereng nena tehkhinin, thawm ring deuh an chhuah a, man erawh chuan tak an nei lo, a ti.

MNF Adviser Lalruatkima chuan, ‘Kan ram hi a la chhe vek lo, chhe ta vek anga sawitu te hian lalna leh thuneih an chak luat vanga an sawi a ni. Ram hruaitu kan neih tawh zawng zawng Ch.Chhunga, Brig.Thenphunga Sailo, Lal Thanhawla leh Zoramthanga te hian ram tan theihtawp chhuahin an bei vek a. Mahse, tun hmaa lian te, zau te leh tha kan tih te kha ram thangzel leh changkang zelah a lo tawk lo mai a ni. Insawisel ringawt hian ram a siam tha dawn lo’ a ti.

Revenue Minister chuan Assam Rifles sawnchhuah tur chungchang sawi langin, “Naktuk April ni 1-ah Union Home Minister, Amit Shah chuan Aizawl khawpui tan mel lung a rawn phun dawn a, mi zawng zawng he hun hmang tur hian ka sawm a ni. Hetiang hun pawimawh hmutu nih hi nakin thlenga kan la sawi tur a ni. A tel ve lo chu lenlai chan an ni ngawt ang. Kan mita bawlhhlawh lut, mit timimtu te an chhuak tur hi lawmawm ka ti a. Party thenkhat erawh an lawm hauh lo, a chhan chu mipui zawng zawng an lawm si a. Chu chu an hlawkpui loh an hlau  a ni” a ti. 

MNF Adviser chuan ‘Kum 2018 inthlan dawna MNF Manifesto number 11 naah ‘Aizawl atangin sipai sawn chhuah a ni ang’ tih a ni a; kan manifesto hi kan dinpui a, kan tihlawhtling zel a ni. Pathian leh mipui zarah kan sorkar zel anga, Zoramthanga sawrkar chuan Sipai chhuahsan tur ram hi mimal hnenah pek a tum lo hrim hrim a ni, a ti.

Sipai sawnchhuah chungchangah Congress party leh MNF duhdan a inang lo tih sawiin, "December ni 1, 2005 ah Zozam Times chanchinbu chuan 'Mipui kutah AR ram hlan a nih loh nan MPCC chuan resolution a pass' tih an tarlang a. August ni 7, 1995 khan Congress President hlui leh khatih laia Chief Minister chuan 'India ramah Khawpui laili atanga sipai sawn chhuak ka la hre lo, chuvangin ka huphurh a ni,' tih a sawi a. MNF chuan mipui kutah hlan kan tum a, Congress in mipui kuta hlan an hlau thung tih hun kal tawha an chetzia khan a tichiang a ni," Rka chuan a ti.

Ruatkima chuan ZPM chu Thereng nen tehkhinin, ‘Thawm ring deuh an chhuah a, han man ila tak a nei lo, hmehsawm theihin a rawp vek.’ Ram hmangaihtu nia insawiin ZPM te hi an aggressive em em a, lalna leh thuneihna chiah duhin an che buan buan mai a ni. Congress ni se Delhi-a an Pisapui, Akbar Road a mite khu a lun tawh lo, maimawm ril in a bawh nual tawh mai thei," a ti.

"Kum 1997 a Nationalism kengtu nia insawia chhuak ta zawng zawng te kha an kal zel a, tunah chuan Nationalism hlamchhiahin Zoram People Movement (ZPM) ah an inchhunkhawm ta vek a. Nationalism kalpuitu nia insawiten 'Chhura aium thlauh' angin Nationalism an thlauh bo ta. Chuvangin MNF aia Nationalism kengtu dik he ramah an awm lo," a ti a.