Aizawl March 13, 2023 : Mizo Hnam Run chhung inkhawm hun hnihnaah thusawitu Power Minister R.Lalzirliana chuan tun hnaia hmun hrang hrang a zin chungchang sawiin, Champhai 'N' leh Champhai 'S', East Tuipui leh Tuichang-ah te MNF party atanga MLA ni mek te chu an la that tawk thu leh party dang tan khin thlak mai chi an la ni lo niin a sawi a, ZPM chu mimala mi bei nasa ber party-ah a puh bawk. 

ZPM chungchang sawiin Zira chuan, "ZMP hi a tha zawnga Zoram kaihruai ngam tur anga insawi, party dang zawng aia danglam ngam tura ngaih, Pathian pawh hnaih bik riau nia in sawi thin an ni a. MNF-in senior front kan tih ang hi ZPM chuan Val Upa Council (VUC) an invuah ve a. VUC-te chuan VIP culture tih hniam te, MLA hlawh chungchang tih hniam te an sawi ve thin a. Mahse, tunah pawh ZPM MLA-te hi designation plate tar mawi ber ber te an ni. An hotupa ber an thiam pui pa Pu Duhoma danglam bikna hi politics-a pawl sawn tam bak hmuh tur a awm lo," tiin, ZPM chu mimal anga mi bei nasa ber party an ni tiin Power Minister hian a sawi.

R.Lalzirliana chuan, "Pastor-ah pawh nihna sang tak lo chelh ve thin pakhat kan inkawm a. ZPM kal dan hian a rilru a tihnat thu min hrilh a, ZPM hi hun enge maw chen kha chu rintlakah kan lo ngai thin a. Bible tan chhana kohhran kan Unit ti thin an ni a. Tuirial bial bye-election ah ZPM chet duh dan atang kha chuan a rinngam tawh loh thu min hrilh a. Inthlan hmasak kha ZPM dinhmun san lai ber a nih a rin thu min hrilh," a ti.

Power Minister hian hripui leh harsatna hrang hrang karah sawrkar anga hnathawh a harsat lai a, department anga hnathawh tawh leh hmalakna hrang hrang an neih mek te a sawi a. Aizawl Khawpui chhunga electric hrui inzam nuai hi felfai taka ABC line-a thlak thuai anih tur thu te, power-a hnianghnar zawk theih nan DPR hrang hrang an siam mek thu a sawi a. "Kumin kum tawpah MLA election-ah MNF kan tling leh ang a, Zoram mipui leh party mipui tan a vur kum a thleng dawn a ni," a ti bawk.