Aizawl April 14, 2023 : MNYF Headquarters Vice President Zodinpuia chuan, ZPM chu mipuiah kalphungthar an zuar chungin vawiin thlengin ram inkaihhruaina chungchang ah kalphungthar a kal an tum dan mipui hnenah sawi tur la hre lo niin a sawi a, ZPM tan sawrkar siam ngaihna a la awm lo, a ti bawk.

Tuivawl South Block MNYF Conference a hmanpui naah MNYF Vice President Zodinpuia chuan, "Kum 2018 MLA inthlan dawnah ZPM hian kalphungthar an tlangau pui tawh a, hemi tuma an kalphungthar zawrh chu MLA hlawhsang lak loh, MLA motor a designation plate tarloh tih vel a ni. Mipui duhsakna dawngin MLA 6 an nei mek a, an MLA te hian kum 2018 inthlan dawna an kalphungthar zawrh kha pakhat mah an zawmlo fai vek a ni. Kumin 2023 ah pawh ZPM hian kalphungthar bawk hi mipui ah an rawn zuar leh a, vawiin thlengin ram inkaihhruaina chungchang ah kalphungthar a kal an tum dan hi mipui hnenah sawi tur an la hre lo, a ti bawk.

MNYF Vice President chuan, Mizo Union leh ZPM kaldan chu a inang hle nia a hriat thu sawiin, nihna duh vang leh ram roreltute itsikna avanga political party din reng reng a daihrei ngailo a ti a. Kumin kumtawp a MLA inthlanpui lo awm turah MNF-in sawrkarna a chang leh ngei dawn nia sawiin, "Kum 2018 MLA inthlanah khan ZPM chuan dahkham chawilohna bial 25 chiah an nei a, heng an dahkham chawilohna bial 25 zinga bial 19 chu hneh taka MNF tlinna bial a la ni vek a. Mizoram politics kaldan thlirin kum 2023 ah hi chuan ZPM tan sawrkar siam ngaihna kawng a la awm lo hrim hrim a ni," a ti.

MNYF Vice President chuan, "MNF chu ralthuam leh sipai chakna hmangin kum tamtak chhung rawt chimih tum a beih tawk tawh ni mahse vawiin thlengin Pathian in a la humhim a, Zofaten zalenna famkim kan neih hma loh chuan Zoram zalenna meichher kengtu a la ni zel dawn a ni", a ti.

"Ni leh Thla kar a leng thin Mizote chu Bristish in sipai chakna hmangin min awpbet a, chumi hnuah kan duhthlanna tel lovin India ram a behtir kan ni a, India sawrkarin fahrawn ang lek a min ngaih avangin kan hruaitu hmasa ten India Danpui (Constitution) chhungah Mizote kan leng ve lo e tiin kum 1966 ah Zoram zalenna turin an bei a. MNF in zalenna hi lo sual lo nise kan chhehvel ramdangte ang bawkin Mizote hi hnamdangin min chimral tawh ang", a ti.