March 12, 2023; ZPM chuan thuchhuah siamin, Inrinni, March ni 11 khan ZPM Leader Lalduhoma’n Aizawl East I chhung a ZPM zawm thar mi 2,146 a lawmlut a. Heng lawmluhte hi MNF atangin mi 770, INC atangin mi 605, BJP atangin 8 leh Neutral 763 atang te in an ni.

Inrinni khan ZPM Aizawl East-I Block chuan Thuampui YMA Hall-ah Block Conference an hmang. He hun hi Lalduhoma, ZPM Leader leh K Sapdanga Working President bakah, General Headquarters atangin hruaitu engemawzatin an hmanpui bawk a ni. 

ZPM Leader chuan thu sawiin, “Congress leh MNF te kan hria a, an rorel kalphung chu kalphung hlui ve ve a ni. Chief Minister chair a thu an inthlak a, an party symbol a danglam a, an flag a inang lo a, kan ram an kaihhruai dan chu a inang reng a ni. He system hi keini chuan thlak kan duh a, kalphung thar kan sawi thin a ni. Keini chuan system kan thlak ang kan ti a, system ṭha hnaiah chuan thil tha tih a awl, system a that loh chuan thil tha a tih theih loh; kalphung thar atan chuan mi tha kan mamawh a ni,” a ti.

Working president pawhin thusawiin, “Mipui sukthlek thlir hian sawrkar kalphung thar an nghakhlel hle tih a hriat theih a, tuna kan ram inrelbawl dan hi chuan kalkan a ngah em em a, hmun kilkhawr zawk a mi ten sawrkar a awm tih pawh hre lo khawpin hmasawnnain a kalkân nasa a ni. Politics hi inbumna tur a ni lo a, ram rorelna tur a ni. Mipuite hian beisei an nei a, chu an beisei chu pe thei awm chhun chu ZPM hi a ni. Chumi pe tur erawh chuan kan thawkrim tur a ni a, thawk tam ber nih kan tum tur a ni,” a ti bawk. 

He hun hi hun hnihah then niin, hun hmasa Pu G. Vullura, President Aizawl East – I Block in a kaihruai a. Rev. Laltanpuia Colney, in hunserh a hmang.