April 11, 2024; ZPM legal board chuan social media hmangin an MP candidate chu tenawm taka beih a ni tih an puang a, David Sailo inti leh Youtuber Tuesday Nighmare te lakah criminal complaint an file dawn tih an sawi.

Vawiin an office a thuthar thehdarhtute an kawmna ah ZPM gen. hqrs, a legal department GS Vanlalsiama Pachuau chuan, nimin (10.4.24) khan kum 2011 leh 2012 bawr vela MAMCO Dy Mananger (marketing) Lalremthanga leh MAMCO consultant nia chhal Mustaqur Rahman, Guwahati ten contract hna pek chungchanga inbumna case chin fel tawh, hremna pawh pek tawh kaihhnawih ah ZPM MP candidate sawi luh ve talh tumna David Sailo inti pakhat thuziah chu social media (facebook leh whatsapp) ah te nasa taka thehdarh a ni tih a sawi.

10.4.2024 zan vek khan tuesday nightmare youtuber channel chuan tu tute emaw phone be kualin, an inbiakna record chu thehdarh a nih mai bakah a rinthu tlem belhchhah in, case pawh la kal mek anga sawi zuiin a thehdarh zui leh bawk tih a sawi a, hei hi thil tha lo tak leh politics a dawt hmanga inbeihna tenawm tak a ni tih a sawi.

Affidavit a hming sign chungchangah Richard Vanlalhmangaiha chu bum tel a ni ve zawk tih sawi bawkin, "MAMCO lam intiamkamna lehkha kan chhiar a nih chuan MAMCO account a sum lut ngei tur anga tarlan a ni a, chumi avang chuan assistant manager a nih angin a sign ve ngei tur pawh a ni. Amaherawhchu, sum luhna erawh MAMCO lam account ni lovin, Lalremthanga leh Mustaqur Rahman account lamah a lo lut leh daih a ni tih ACB te hian an chhuichhuak leh vek," a ti bawk.

Tuesday Nightmare youtube channel in phone call record a pho chhuah a, mi pakhat a tih pawh Tlanghmingthanga, Mission Vengthlang ni ngeia an hriat thu leh MNF ruhkawl, mi thenkhat phei chuan Pu Zoramthanga uite tihial a an sawi thin a ni tih ZPM legal department GS chuan a sawi a, "Pu Tlanghmingthanga hian Pu Lalremthanga leh Pu Richard Vanlalhmangaiha te awmdun laia pawisa fai hlan fo anga a sawi hi investigation report leh court judgement atangin dawt a sawi chiang hle a ni tih a hmuh theih," a ti.

Case chinfel vek tawh leh special court zahawm takin thutlukna a siam fel tawh laia a ching pawr zawnga thu lo vaivir kual hi court zahawmna tihbawrhbanna a an ngaih thu leh court rorelna zah lohna a an ngaih thu sawi bawkin, tawp san mai an tum loh thu te, criminal complaint pawh file zui thuai an tum thu te a sawi bawk.