Aizawl: Zoram Peoples Movement party chuan Aizawl North II bialtu MLA Dr. Vanlalthlan chu Budget Session-a a chet danah an chhuang tak zet tih an sawi.

Nimina thuchhuah an siamah ZPM chuan ZPM legislature party secretary, Dr. Vanlalthlana chuan tun session ah private bill, 'The Mizoram Land Revenue (Amendment) Bill, 2023' a putluh bakah nikum lamah 'The Mizoram Private Transport Workers (Welfare) Bill 2022' a lo pulut tawh bawk nia sawiin, "Eptu member ni chunga a kum zawna private bill pulut thei khawpa Dr. Vanlalthlana taimakna hi a fakawm em em a, ZPM chuan kan chhuang takzet a ni," an ti. ZPM chuan eptu member bill a nih avanga rorel lai mek ten an pass pui duh lo anga lang chu pawi an ti hle tih sawi bawkin, 'ram hmasawnna tur bill pawimawh tak tak pahnih a kum zawna pass loh a ni hian ram tana legislator thahnemngai te inpekna a ti pamhmai hle a. Heng bill te pass a nih loh nana dangtu rorel mek party te hian mipui hma an ngai tak tak lo niin a hriat bakah, kan sawrkar hrawn meka rorel lai ten eptu te an enhranna nasa lutuk a tilang chiang hle niin ZPM chuan a ngai a ni,' an ti bawk.

Session neih mek chungchangah ZPM chuan House member zingah sawihona pawimawh a awm laia nungchang mawi lo te, tawngkam chaltlai tak tak te, eptu member-te elsenna te, thu pawimawh sawiho laia fiamthu nena khawsak ching member thenkhat an awm hian House a tizahawm lo a ni tiin ching chhunzawm tawh lo tur leh ram leh hnam tana ngaihtuahna tak tak seng turin an ngen tih an sawi bawk.