DOWNLOAD OUR APP

Read latest news on your phone
app-store

ZPM-in Inthlan hmaa Kuhva hralhna rate leh market puan theih tum?

Nov 24, 2022

ZPM Hachhek North Block Conference a hmanpuinaah ZPM Leader Lalduhoma chuan, Inthlan hma ngeiin Hachhek leh Mizoram atanga Kuhva hralhna tur rate leh market puan hman tumin hma an lak tur thu a sawi a, Kuhva chingtute leh company te direct-a an indawr dan tur ngaihtuah a nih tur thu a sawi bawk. Working President K. Sapdanga pawhin Kuhva kung thlir chunga vote thlak turin Hachhek mipui te a sawm bawk.

Aizawl November 24, 2022 : ZPM Hachhek North Block Conference a hmanpuinaah ZPM Leader Lalduhoma chuan, Inthlan hma ngeiin Hachhek leh Mizoram atanga Kuhva hralhna tur rate leh market puan hman tumin hma an lak tur thu leh Kuhva chingtute leh company te direct-a an indawr dan tur ngaihtuah a nih tur thu a sawi. Working President K. Sapdanga pawhin an Kuhva kung thlir chunga vote thlak turin Hachhek mipui te a ngen bawk.

Lalduhoma chuan, "Helai biala kan Bru unauten min tilawm hle mai, tihian khawvel awmchhungin kan inthen tawh dawn lo niin a lang a, inthliarhran hi kan duh tawh lo a ni," a ti a. "Kuhva hian 'bana kaih policy'-ah hmun pawimawh tak a chang dawn. Tunah chuan kan sawrkar hotute leh smuggler-te hi an inngheng tlat niin a lang a, opposition party kan ni a, tih theih kan nei tam lo. Kan sawrkar chuan kuhva hi hna hmasaah kan nei dawn a, a tám tur laka invenna pawh kan ngaihtuah ang. Kuhva sawngbawl dan zira training turin kan intir dawn a, a hlutna tipung turin tihdan kan zawng ang. Kuhva chingtute leh company-te direct-a kan indawr dan tur kan ngaihtuah ang a, kawng awm zawng zawng kan dap ang. A man pawh fel taka tuk kan tum dawn a, helaiah a rate leh a market hre sa in, inthlan dawnah in hmaa puang thei turin kan rawn inpuahchah ang. Keini ram hi kuhva atanga hmalak belh tura theihna nei kan ni," a ti 

ZPM Working President K Sapdanga pawhin Kuhva hralhna chungchang sawiin. "Hachhek tlangdungah Kuhva rah la inkhai kan hmu a, a mi deh dan a dang ngei mai. Kan eizawnna bulpui berah harsatna kan tawk a, a tuar nasa ber tlangdung kan ni. Kan hlimna leh thlamuanna min petu khan kan lung a tichhia a, kan mittui a tla a ni. Khawtlang leh chhungkaw tam takin innghah nan kan lo hmang tawh thin a, vawiinah chuan hunpui kan huphurh ta a nih hi. Chhantu kan nei lo em ni? Thuziak tlar hnih khat leh memorandum hian min chhanhim zo lo a ni. Kan mangan mek laia kan ram hruaitu ten min muthilhsan hi a mak a ni," a ti.

Sapdanga chuan, "Khawvel ram ropuite hi an leilung hausakna chhawr thiam te an ni. Helaiah hian thawkrim tura infuih a ngai lovin kan thawkrim em em a, kan thawhrimnain awmzia a nei ta lo hian rilru a tina a ni. Mizoram hi thlai tinreng ngeih a ni, chung zingah chuan Kuhva hi a thawhhlawk ber, he tlangdung pawh a thawhhlawk ber kan ni. Kan harsatna hi engvangnge? Tute nge kuthnathawktute harsatna siam tih hi kan sawi pawh ngai lovin in hria e. Pathian leh mipuite zarah, kum 2023-ah hian he party hian thuneihna a chang a nih chuan he harsatna hi in tawk tawh lovang tih kan tiam ngam a ni," tiin, "Nakkumah inthlan kan thleng dawn a, kan duh kan tungding thei a, kan duh kan nawrthla thei. Last minute kan hmachhawn dawn a, hetiang tih ching te hi ram hmelma an ni. Mipuiten kan thiltihtheihnain, kan tan, i tan, eirukna leh last minute hi i dah Nil ang u. Kan kuhva kung mitthla chungin vote i thlak ang u aw," tiin mipui te a sawm bawk.

Share now