Aizawl April 23, 2023 : Vawiin ZPM chhung hun hnihna inkhawmah Dr. Kenneth Chawngliana, Vice President kaihhruainain LMC inthlana ZPM-in sawrkarna a siam theih avanga lawmthu sawina hun an hmang. President Laliansawta leh Aizawl North II bialtu Dr. Vanlathlana ten lawmthu an sawi.

Lalliansawta chuan Pathian leh mipuite zarah ZPM-in hun chhinchhiah tlak tak leh hun ropui tak a chang chu lawmawm a tih thu a sawi a, thahnemngai taka thawktu te chungah lawmthu a sawi a bawk. Mipuite beiseina ti thlawn lo turin LMC councillor thlan thar te leh party mi te a chah nghal bawk a ni.

He huna thusawitu ZPM Legislature Party Secretary Dr. Vanlalthlana, MLA chuan LMC chungchang sawiin, “Tuna kan dinhmun hi keimahni thawhchhuah a ni lova, min thawhsaktu a awm a ni. Chapo thei kan ni lova, inngaitlawm takin hmalam i pan zel ang u. Pathian lam en tlatin kal ila, kan tih ve tur chinah erawh rinawm leh Pathian lawm tlakin thawk zel ila, he ram tana tawngtai zel chungin hma i la zel ang u. Pathian malsawm tlaka hna kan thawh phawt chuan kan hmahruaitu hian kawng laklawhah min tawpsan lovang tih i ring tlat ang u. ZPM nih te, Pathian faka chawimawi te, mi dang tana malsawmna nih te hi zak lo ila, ‘kei chu Lalpa engmah ka ni lo, nangmah rinchhanin he ram tan hian ke pen ve ka duh a ni,’ tiin Pathian i au thin ang u,” a ti.

He huna ZMP frontal organisation ten chawimawina thilpek an hlan Dr. Vanlalthlana chuan, “Assembly Session liam ta ah khan private member bill kan han pulut ve rawih kha a ni a, session hmasa lamah driver-te hamthatna bill ka lo pulut tawh bawk a. Kan hotute duhsakna avangin heng ang hun tha ka nei thei hi ka lawm hle a. Duhthusam ang chiahin pass ni ta lo mah se, kan hlawhtling hle a, committee siama enzui tur tala ruahmanna siam a ni ta te kha a lawmawm takzet a ni. Keima chaknaa heng thil hi puitlin thei ka ni lova, kan thawhhona avang chauhin heng thil hi kan ti thei a ni,” a ti.

Dr, Mathlana chuan, “Congress leh MNF te hian ram tan an theih tawk an lo chhuah tawh a, hmasawnna min lo thlen tawh thlir hian hei aia tha hi a awm thei ang, dan pawisak lohna awm thin te hi tun aia tha hian tih theih a ni ang tih kan beisei. A tha zawk beiseitute kalkhawm chuan ZPM hi kan siam a ni ber, kalphung thar - thang lo thar zel tur tana belhfakawm ni turin kan inbuatsaih mek. Tha famkim bik lo mah ila kan hmahruaitu hian hna min thawhsak zel a; mi beidawng kalkhawm kan ni lova, beiseina thar nei kalkhawm kan ni zawk. ZPM hian chhuan tur kan nei lova; kan chhuan ber chu dikna, rinawmna, Pathian duhzawnga rorelna tundin hi a ni a. A thawkrim ber, a taima ber kan nih phawt chuan hei aia ram nuam, kan thlah kal zel tur tan chenna tlakah he ram hi siam kan tum a ni,” a ti.