ZALEN September 30, 2025: India rama Congress party committee pawimawh AIACC national executive member leh MPCC adviser ni bawk, Zodintluanga chuan Dampa bial by-election lo lawm turah Congress party vote a tha ber a, a him ber bawk tih a sawi.

Dampa biala Congress party tana campaign a thang mek Zodintluanga chuan by-election a ruling party vote kher hi mipuite bat a ni lo tih sawiin, "Dampa bial mipuite hian ZPM candidate lo thlang tling pawh nise, tuna an sawrkar, kum 2028 a tla zui ngei ngei tawh tur hi a nihna tur angin a thi beh pha chin an inrem khat vek tawh a, MLA thar tan dinhmun tha emaw dinhmun duhawm inpek tur an nei tawh lo. Chumi piah lamah MLA an neih belh leh chuan a inluling a, inti lal tur an tam phah mai mai tawh a ni," a ti.

Zodintluanga chuan ZPM chu party hrang hrang atanga lungawilo kalkhawm an nih miau avangin an party chhungah kalphung thar tia an sawi an kalpui duhdan a danglam nuai a, hei hian an chhungkuaah hlawm hrang hrang a siam a, a thei zawk, a ti thei bik nih an inchuh mek a, chu chu Mizo mipuite hian kan tuar mek a ni, a ti.

“Dampa bial hi hnam hrang hrang inchenpawlhna a nih avangin bialtu MLA chak leh thothang tha, tawnhriat ngah tawh a mamawh a, chu mamawh chhanna chu Pu John Rotluangliana-ah hian a awm vek a ni,” Zodintluanga chuan a ti.

Dampa bial mipuite’n ngun taka by-election lo awm tur chu an thlir a tul thu sawiin Zodintluanga chuan ZPM sawrkar chu a bilh atangin a tho lo laklawh tawh nia sawiin, “An pu berin a duh duh a sawi a, Assembly House ah ngei kan police te an thlamuanpui tlak loh, kut vung ber bur, ke vung ber bur tia a sawi ngei te kha opposition leader sawi te a ti leh vel mai mai a ni,” a ti.

Khaw hrang hranga a thusawinaah Congress Adviser Zodintluanga chuan kawngpui tha, international standard kum 15 daih kan siam ang tia tiamtu ZPM in kawngpui an han siam a, ribbon chep chat meuhva kawngpui repair tur an hawn Bawngkawn to Chanmari road te chu kum 15 daih chu sawi loh, an siam chhe lutuk a, a siamtute bawkin zuk hawlh khawk leh vek a. Prime minister a lo kal dawn a, Chaltlang lam kawng an han chei thar ngawt pek a nih kha, tiin a sawi bawk. 

Zodintluanga chuan, “Dampa Bial tan hian Congress candidate vote mai hi a tha in a him ber a. Tuna kan candidate, kan vice president Pu John Rotluangliana hi mi chak, mi viak tha, mahni bial vei tlur chi a ni a. Kum 2028 a tla mai tawh tur lo vote tlin ai chuan kum 2028 Congress sawrkar thara minister ni zui mai tur lo vote tlin kha a finthlak zawk tih Dampa bial mipuiten lo hria ula ka duh a, Congress candidate Pu John Rotluangliana lo vote turin ka ngen bawk che u a ni,” a ti.

Zodintluanga hian Thawhtanni atang khan Dampa bial khaw hrang hrang a tlawh a, Reiek, Ailawng, Hruiduk, Kanghmun, Lungphun, Bawlte, Sabual, Darlung tew bakah Lungdar leh Khawrihnim khuate a tlawh a ni.