ZALEN January 29, 2026: ZPM Spokesperson K. Laltluangkima chuan Mizoram Pradesh Congress Committee (MPCC) ten Kawngzawh Pui huaihawt an tum chu ZPM Gen. Hqrs. chuan a tlangpui thuin an hriatthiampui thu a sawi a, kawngzawh chhan tur chhuanlama an ngaihdan pawh a sawi tel bawk.

K. Laltluangkima chuan, "Lengpui Airport ram hralh an tih hi Lengpui Airport ram a ni lova, Lengpui ram a ni ringawt a ni. Amaherawhchu, tute pawh nise to uchuaka ram hralhte, ram dan kalphung pangngai pela ram inleisak te, sawrkar hruaitu lawk ber berte hriatpuina ngeia inbiakremna thui tak kalpuite hi keini pawhin tha kan ti lo a, hetiang hi thleng tawh lo se kan duh. Tin, ni 31, January 2026 Inrinni hian ZPM Party Media Chairman Pu B. Lalchhanzova’n Press meet a buatsaih dawn bawk a, chutah chuan Zoram mipuiin kan hriat chak Lengpui ram inlei chungchang fiah takin a sawi dawn a ni," a ti.

ZPM Spokesperson chuan, "India ram hi Secular Country a ni a, chumi awmzia chu sakhaw hrang hrang vuantute inngeih leh inlungrual taka cheng za tura beisei kan ni. Engemaw lai atang khan, a bik takin Kristiante chunga hleilenna a zual ta hle a, heihi ZPM Party chuan a duh lovin a ngai thutak hle a ni. Kristiante tihduhdahna hi Central-ah Congress an sawrkar lai atanga lo awm tawh, BJP sawrkarah pawh awm chhunzawm zel a ni a. India ramah hian a tam ber Hindu sakhua vuantute an nih miau avangin Central-ah tupawh sawrkar se, he thil hi chu Kristiante chungah thleng reng tur anga ngaih theih a ni a, a vanduaithlak em em a ni. Chuvangin, Zorama ringtu zawng zawngte kan rinna kawngah midang a innghat lovin, nghet taka din kan tum theuh a pawimawh a ni," a ti.

K. Laltluangkima chuan, "Tun hmaa ni 100 inhlawhna kan tih mai, ‘Mahatma Gandhi National Rural Employment Guarantee Act (MGNERGA) – 2005,’ Dr. Manmohan Singh te, Pi Sonia Gandhi ten an lo duan chhuah thingtlang mite chawikanna project chu December ni 18, 2025 khan BJP Sawrkar chuan VB-G RAM G Bill-2025 tiin an thlak ta a, a lam pum chu ‘Viksit Bharat-Guarantee for Rozgar and Ajeevika Mission (Gramin) Act - 2025’ tihna a ni. He dan inthlakthleng hi Mizoram Congress chuan tha an ti lova, tha an tih lohna hi thui takin kan hriatthiampui a ni. A chhan chu India hnam Pa Mahatma Gandhi-a hming chawia phuah a ni a, tunah BJP-in Hindu pathian rawng kaiin G-RAM-G an rawn ti ta mai a. A kalphung tam ber an la chhawm lawi si a, a hming an thlak ringawt mai hi a runthlak kan tihpui em em a ni," a ti.

"A tawp berah chuan Indian Constitution hian lungawilohna lantir (Peaceful Demonstration) hi a khap lova, chuvang chuan midang tana hnawksak lo leh mite tana huatthlala lova kan duh loh zawng puan chhuah leh, lungawi lohna lantir a kawng zawhte hi a thiang em em a ni. Amaherawhchu, mi tana hnawksak lo leh nunphung tibuai lo zawnga kalpui ni thei hram se tih hi ZPM Gen. Hqrs. duh dan leh ngenna a ni," a ti bawk.