Aizawl April 12, 2023 : Vawiin khan Mizo National Youth Front chuan an Vice President Zodinpuia hovin Chanchinthar lakhawmtute an hmachhawn a, ZPM-in naktuka Sports Minister Robert Romawia Royte bang tura nawrhna huaihawt an tum chu mimal inhuatna vanga an ngaih thu an sawi. A tawp thlengin an thlawp dawn tih an sawi bawk.

Zodinpuia chuan, "MNF sawrkar hnuaiah mizo thalaite'n infiamna kawng hrang hranga an rualawhna sukiang turin nasa taka hmalak a ni a. Chief Minister Pu Zoramthanga leh Sports Minister Pu Robert Romawia Royte te hmalakna avangin Mizoram chuan infiamna ruhrel din kawngah hmasawnna tam tak kan nei thar ta hi MNYF chuan lawmawm kan ti hle a ni," a ti.
    
MNYF Vice President chuan, "Hetihlaia Mizo thalai leh infiammite hmasawnna tura nasa taka thawktu Sports Minister Pu Robert Romawia Royte chu ZPM party hian hmu thei lovin; kil hrang hrang atanga beihna tur an dap reng a. Social media ah tawngkam chhe tinreng a chirhtheh in, thu awmze neilo hmangin Governor ah te hial hekna an thehlut a. Naktuk ah pawh ECI in an beisei ang thutlukna a siam dawnlo tih hre lawk ang hrim in mipui rilru hruaikawi nan punkhawm buatsaih an tum te hi MNYF chuan zahthlak hle ah kan ngai a ni," a ti.

MNF Thalai hruaitu chuan Assembly House-a dawt a sawi avanga ZPM Leader Lalduhoma’n ngaihdam a dil tuk atangin ZPM hian kawng hrang hrangin Sports Minister Robert Romawia Royte beihna tur an dap, a ti a, Governor-ah hekin; MLA atanga ban turin an thlen hial a. Dan hre miten an zirchianna atangin Minister zahawm tak hian dan a bawhchhe lova, ZPM hian an chin mek politics a mipui rilru hruaikawi nan thudiklo an vawrhkual a ni tih mipuiin hria se an duh thu a sawi.

Assembly House ah ZPM MLA pathum - Leader Lalduhawma, Lalchhuanthanga leh C.Lalsawivunga te chuan dawtin MNF sawrkar an puh tiin, Assembly chhannah an dawt sawi hi a chiang niin an sawi. 

MNF Thalai chuan, ZPM a din hnuah dawta inchirhthehna Mizoram politics ah a lar thar, an ti a, hei hian kan Mizo khawtlang nun nuamtak tichhia in, kohhran leh chhungkaw inrelbawlna thlengin nghawng tha lo a nei ang tih an hlauh thu an sawi. Minister Robert Romawia Royte chu an chhuan thu leh a tha tichak turin an thlawp zel dawn tih an sawi bawk.