Aizawl: Zoram Peoples Movement chuan Aizawl khawpui traffic jam 55% a tihziaawm dan tur an ruahman. Nimin khan Aizawl Press Club-ah chanchinbumite kawmin ZPM hruaitu F.Rodingliana chuan he thu hi a sawi a, “Aizawl khawpui junction 3 Zodin, Bawngkawn leh Chanmari biak in bulah te awlsam zawka lirthei chetvelna tur ruahman kan tum a. Hei bakah Aizawl khawpui hmun 9-ah open air escalator siam kan tum a ni,” a ti. F.Rodingliana chuan lirthei intlanchhawk vangin traffic jam a ziaawm phah lo nia sawiin, “Intlanchhawk tirh thla 2/3 vel kha chu a ziaawm a; mahse, sawrkarin motor registration chungchangah dan mumal a siam loh avangin mi hausaten lirthei an lei belh teuh teuh a, mi hausaten harsatna an tawk lo a, mi retheiten an tuar zawk a ni,” a ti bawk. Thlai thar lei chungchangah F.Rodingliana chuan ruahmanna an siam lawk vek tawh niin a sawi a, “NLUP-ah pawh let leh tur awm miah lovin crore 4800 chuang daih an tiral mai mai thei a, keini chu let leh tur a la awm dawn a. Kan lei theih leh theih loh chu Zoram mipuite hian min chhin turin kan sawm che u a ni,” tiin a sawi a ni.