ZALEN November 22, 2024 : Congress party chuan vawiin khan Golden Hall, Congress Bhawan-ah Political Session an hmang. He hunah hian MPCC President Lal Thanzara chuan, sawrkarin VC term a hun hmaa tihtawp a nih chhan chu VC-ah party dang an la tam avangin thawhpui a har tih chu an chhuanlam a ni, tih chanchinbu pakhatah tarlan a nih thu a sawi.

Lal Thanzara chuan, "Ram rorelnaah Pathian ram tundin tumtute hian Pathian ram ni lovin ZPM ram tundin an tum avangin mipuiin an aiawha an thlan khawtlang enkawltu Party dang an en hran tlat avangin tuna Sinlung Hills Council-a enkawl tura mipuiin an thlan tlin te pawh ZPM-in sawrkarna an siam loh avangin an thiat leh duh mai ang tih a hlauhawm hle a ni," a ti.

Inthlan dawnah thutiam neiin duhsak bik nei lo tura intiam ten thuneihna a ni lo zawnga hman an chin avang hian mithiamte chuan thubuai thehluhna tlakah an ngai niin a sawi.

ZPM-in Inrenchem kalpui an tum dan chungchang sawiin Lal Thanzara chuan, "Mipui damdawi kha min ei tir a, anni chuan Lalipop an hmuam thung. MNF khan bawhzui tur dik an bawhzui loh avangin Lunglei Polytechnic-ah zirlai ten harsatna an tawk a, ZPM lahin zirlaite hmakhua an ngaihtuah loh avangin tunah he harsatna hi a thleng a. Zirlai te ngaihsak leh ngaihven sawrkar kan mamawh zia Mizoramin kan hmu mek a ni," a ti.

Mizoram chaklakna pui ber kawng chhia siam tura hmalakna tak tak a awm lo, a ti a. PWD khawih tur hun chhung tawp tawh hnuah pawh a siam tur Company-in hmalakna thar engmah an la nei lo, tih sawiin, Mizoram mipuiin an harsatna sukiang turin Congress sawrkar hun an nghakhlel tawh, a ti.