Aizawl April 20, 2023 : Zemabawk, ITI leh Durtlang Leitan-a Local Council bye-election zawh taka Zemabawk leh Durtlang Leitan-ah te an candidate-te thlantlin an ni chu ZPM General Headquarters chuan lawmpuina leh duhsakna an hlan a, mipui te chungah lawmthu an sawi.  ITI Veng-a an candidate tling zo ta lo Ricky Vanlalhruaia pawh duhsakna an hlan.

ZPM President  Lalliansawta chuan, “Zemabawk leh Durtlang Leitan LC Bye Election-ah Pathian leh mipui zarah sang takin hnehna kan chang hi a lawmawm hle mai, hetianga hlawhtlinna kan chan theihna tura thawktu zawng zawng chungah kan lawm a ni. Unit, Group leh Block hruaitute, General Headquarters atanga Co-ordination Committee leh Observation Team te, a enkawltu Organisation Department te an thawkrim hle. Mimal, Unit leh Block atangin tanpuina pawisa fai engemawzat kan dawng a, a lawmawm! Kan candidate leh an chhungte inpekna leh thahnemngaihna avangin ZPM kan ropui ve mai chuah a ni. ITI Veng-ah erawh kan chak zo lo a, pawi kan ti hle; candidate leh party worker te thawhrimna kan hriatpui a, hlawhtlinna chan hun a la awm ngei ang tih kan beisei tlat a ni. Pathian ropui se la, sawrkar tha siam turin theihtawp i chhuah zel ang u,” a ti.

Leader Lalduhoma pawhin, “Pathian leh mipuite zarah a vawi thum nan, Bible-in sual tinreng bul a tih sum thiltihtheihna chu hnehin a awm leh ta a, lungthu a kim ta. Campaigner zawng zawngte chungah lawmthu ka sawi e. Tumah mawi lo taka che leh tawng awm lo va, Pathian hnena lawmthu sawi tawngtai rualna kan nei thin hi hmuh a nuam! ‘Ka thlarau zawkin le tih hi kan innghahna lo ni zel rawh se,” a ti.

ZPM Legislature Party Deputy Leader Vanlalhlana chuan, “Ka bial chhung Durtlang Leitana LC bye-election neihah ZPM candidate Biakkima hneh taka min vote tlin saktu te chungah lawmthu ka sawi. Durtlang Leitan, Zemabawk leh ITI Venga thawktu Headquaters, Block, Unit leh Campaigners hah taka thawktu zawng zawngte chungah lawmthu kan sawi a, Neutral ten an khawngaih vote hlu tak min pek avangin kan lawm. Lalpan in tha leh tui, sum leh pai sen zawng zawng te malsawmnain a let tam takin vur che u rawh se,” a ti bawk.

ZPM chuan Local Council member atana thlan thar te, ram leh hnam tan, khawtlang tan theihtawp chhuaha hna thawk turin duhsakna an hlan a; dikna, taimakna leh huaisena nen Zoram nuam siam tura tan la sauh sauh turin an chah.