Aizawl : Nimin khan ZPM Party chuan AMC inthlan lo awm tura atana campaign kharna hun hmun hrang hrangah kan hmang a. ZPM thalai buatsaih ‘ZPM Kalphung Thar Street Campaign’ hi hmun hnih – Vana Pa Hall leh Zarkawt Kawnah te hman a ni a, ward hrang hrangah ward bila hun hman a ni bawk.

Vana Pa Hall-a hun an hman chu thalai Vice President Dr C Lalrammawia chuan a kaihruaiin, F Rodingliana, Consultant, ZPM General Headquarters-in hunserh hmangin, Lalduhoma, Leader ZPM bakah PC Vanlalruata, Secretary General leh B. Lalchhanzova, General Secretary (Organization) ten thu an sawi.

He huna thusawitu Duhoma chuan, “Tunhnaiah mi 700 chuang pension an awm, sorkar-in sum pek tur a nei lo. Contract bill atang thêp thuap a, rapthlak tak pakhat chu kumin chhungin kan sum vawi ruk kan sorkar hian a lilam a ni. Tunah hian puk chawpin min kaihruai mek a, puk chungin min enkawl mek a ni. Hengte hi nakin kum sawm hnuah te, kum 15 hnuah te a capital nen rulh ngai a ni a. Nakina sorkar lo la awm turte tan a pawi em em a, a rapthlak hle a ni,” a ti.

Zarkawt Kawna hun hmannaah hian Laltanpuia Zote, Vice President, ZPM Thalai Headquarters chuan kaihruaiin, C. Lalthanfela, General Secretary, ZPM General Headquarters in hunserh a hmang a, K. Sapdanga, Vice President leh Pu TBC Lalvenchhunga, PAC Member ten thu an sawi.

K Sapdanga chuan, “ZPM-in AMC-a Ward Committee din a tum hi Congress party leh MNF party-te hian â min ti hle a, hmangchang kan hriat loh vangah an ngai a. Keini lah chuan auhla berah kan neih ngat ngat mai si a, ‘Kan ât leh nangni tan’ tih ang deuh khan, AMC-a Ward Committee din a, hna thawhtir hi a atthlak a nih pawhin, ZPM chuan at kan han so ang a, mipuiin an thatpui phawt chuan, pawl â nih hlawh kan pawi ti lo. Dan siamtu Congress party-te finna leh remhriatna kha, a taka chantir kan tum a ni,” a ti.