ZALEN April 27, 2026 : Mizo Hnam Runah chhung inkhawm chu vawiin khan neih a ni a, AMC result chungchangah MNF Treasurer leh AMC Campaign committee chairman ni bawk Lalruatkima chuan thu a sawi a. "ZPM te kan lawmpui a, Pathian hunbi ruatah an chuang a, tha taka Aizawl khawpui tana rorel turin duhsakna kan hlan e," a ti a, AMC inthlanah khan ZPM te chu MCC an bawhchhe nual niin a sawi.

Ruatkima chuan, "Candidate kan nei tha a, Aizawl enkawl tura tha tak takte an ni. Chutih laiin kan tum ang kan thleng zo lo erawh pawi kan ti a. Kan candidate hlawhtling ta rih lo zawng zawngte MNF kaltlanga rawngbawl zel turin ka ngen a ni," a ti a. "Model Code of Conduct bawhchhia MNF-ah kan awm lo niin ka hria a, ZPM lam erawh chuan bawhchhia an awm nual niin a lang. Eng pawh nise, Pathianin MNF hi hun tha min la pe leh ngeiin ka ring a ni, " a ti bawk.

MNF Treasurer chuan, "Rorel lai party-te an tang hle a, sawrkar hna te an tiam a, thil tam tak an tiam a, buhfai thlengin an sem a ni," a ti a. Tun ZPM term chhung hian inthlanna lian tham - Sinlung Hills Council, Lai District inthlan, Dampa bial by election-ah te kan tling deuh vek a, tun tum erawh kan chak zo ta lo a ni, " a ti.

Ruatkima chuan, "MNF chu Pathian leh kan ram tan, titu kan ni a. Kan ram, kan hnam leh kan sakhua a him theih nan theih tawpin kan bei zel dawn a ni. Pathianin rem a tih chhung chu MNF hian he ram leh hnam leh kan sakhua, kristianna chawinung tur hian kan bei zel dawn a ni," a ti bawk.