October 16, 2023 ; October 14, 2023 (Inrinni) khan ZPM Aizawl North - I te chuan Bawngkawn South YMA Hall-ah Block Conference an hmang a. He hun hi ZPM Leader Lalduhoma'n hmanpuiin, ZPM zawm thar mi 489 ZPM Leader a lawmlut niin thuchhuah an siam.

He hun hmanpuitu ZPM Leader Lalduhoma chuan, “Thil hi a that dawn leh dawn loh enchhin a ni thin a, kum 36 chhung party pahnih thuhnuaiah kan lo awm tawh a, a thlakna tur hian 'midang enchhin' tih tawngkam kan hman hi a fuh em em a, a sualna a awmlo a ni. Beih kan tawk nasa a, inthlan a nih reng rengin ruling party kan beih rawn thin a ni a, tunah erawh chuan ruling party leh a dangten kan party min beih rawn ta a, hei hi a danglam hle a ni,” a ti. 

ZPM Leader chuan, "Vanneihthlak takin ZPM kan dintirh, party pawh kan la nih hma, mahni party theuh pawh kan la thiah hma hauhin tangrual angin 2018-ah inthlan kan hmachhawn a, pahnihna kan ni a, tichuan Legislative Assembly-ah opposition party lian ber kan lo ni ta a. Tuirial bial by-election ah te, AMC inthlanah te pahnihna kan ni chho ta zel a, a hnu deuhah phei chuan pakhatna kan lo ni ta a ni.

"Serchhip by election-ah te, LMC inthlanah te, Zemabawk Local Council inthlan ah te, party dang an nil a, keini’n seat zawng zawng kan la a, chuvang chuan inthlanpui thlen hmain pakhatna kan ni chho ta zel a. Tapchhak titi te, a nih loh leh opinion poll hrang hrangte han en hian sawrkar tura rin ber kan lo ni ta. Mihring lam inbuatsaihnaah chuan kan inpeih ve thawkhat hlein kan inhria a ni," a ti bawk.