ZALEN October 17, 2023 : Vawiin khan India ram Congress hruaitu Rahul Gandhi chuan Aijal Club-ah chanchinthar lakhawmtute a kawm a, ZPM leh MNF te chu Mizoram-a BJP rawn luh nana kawng hawnsak tu tur nia a ngaih thu a sawi.

Press conference-ah hian Rahul Gandhi chuan Mizoram rawn kal chu nuam a tih thin thu a sawi a, inthlan zawh hnuah pawh mi tam zawk kawm tura rawn kal leh a tum thu a sawi a, zawhna hrang hrang a chhang a, Mizo ten culture, sakhuana leh tih dan phung a neih te nuaibo a nih lohna turin theihtawp an chhuah thu a sawi a, India ram chu hnam hrang hrang awmkhawm a nih angin sakhaw pakhat kal dan anga kal thei a ni lo, a ti.

Congress ten Hamas an thlawp chhan chungchang zawhna chu Rahul Gandhi chuan, "Tharum thawhna hrim hrim Congress-in a thlawp lo a, khawi hmunah pawh ni se, Manipur a ni emaw hmun dang khawi hmunah pawh ni se, tharum thawhna hi kan thlawp lo. Hmeichhia, nunau leh pawisawi lo te nunna inlaksak hi sual a ni, dan bawhchhiatna a ni. Keini chuan tharum thawhna hrim hrim hi kan thlawp lo a ni," a ti.

India rama Congress dinhmun chungchang a hmuh dan zawh a ni a, Rahul Gandhi chuan Congress chu dahhniam chi a ni lo niin a sawi a, BJP an tha viau-a an sawina Karnataka-ah pawh hneh takin sawrkarna an siam thei a ti a, November-a inthlanna tur Mizoram, Chhatisgarh, Madhya Pradesh, Rajasthan leh Teangana-ah pawh hnehna an chan leh ngei a rinthu a sawi a, Congress sawrkarna state-ah hmasawnna tam tak hmuh tur a awm niin a sawi bawk.