ZPM minister leh MLA te'n kawngpui siam invil chhawk kha politics-a lemchanna a ni - MPCC Spokesperson

ZALEN September 35, 2025 : MPCC Spokesperson Dr Lallianchhunga'n ZPM minister leh MLA te'n kawngpui siam an invil chhawk kha politics-a lemchanna mai a nihzia a lang chiang tih a sawi.

  Ningani khan MPCC thupuangtu Dr Lallianchhunga chuan Sairang leh Kawnpui inkar kawngpui chhiat avanga lirthei tangkhang mekte a hmunah tlawhin, an harsatna a enpui a. Kumin July thlaa kawngpui chhiat lutuk avanga ni tam tak bungraw phur lirthei an tan hnuah, September thlaah kawngpui chhiat lutuk vang bawkin bungraw phur lirthei tam takin tunah an tangkhang leh mek tih a sawi.

  Dr Lallianchhunga chuan National Highway-306 hi sorkar hmasa hunah pawh harsatna awm tho mah se, ZPM sorkar hunlai ang em em chuan bungraw phur lirthei ten harsatna lian tham an tawk ngai lo tih sawiin, "Sairang leh Khamrang inkar hi km 20 bawr vel lek a ni chungin, Khamrang atanga Sairang thlen nan bungraw phur lirthei ten ni thumte an mamawh hial a ni," a ti.

  September 2024 atangin thla 10 chhung Mizoram sorkar kutah National Highway-306 hi a awm tih sawiin Dr Lallianchhunga chuan, Mizoram sorkar kuta a awm chhung hian ZPM sorkarin kawngpui siamah mawhphurhna a la ngam leh si lo tih a sawi a. Kawngpui chhiat chhana sorkar hmasate mawhpuh rei avangin hetiang dinhmun chhe tak hi tawk an nih thu a sawi.

  MPCC General Secretary ni bawk chuan, bungraw phur lirthei ten harsatna an tawh nasat tak em avangin NH-306 siam mek hi ZPM minister leh MLA ten ni tin a inchhawka kawng siam an vil chungin, thla hnih pawh a liam hmain heti khawp hian a chhe leh hman tih a sawi a. ZPM Minister leh MLA ten kawngpui siam an invil chhawk kha politics-a lemchanna mai a nih zia a lang chiang hle tih sawiin, "NHIDCL leh an contractor ten ZPM minister leh MLA te kha an ngai pawimawh lo hle tihna a ni," a ti.

  Mizoram sorkarin kawngpui siamna tur atan kumin April – August chhungin Road Maintenance Cess atangin Rs nuai 2,349 chuang (Rs.23,49,65,447) a hmu tawh a. Kawng siamna atan mipui thawh khawm sum a awm a, mahse siam tumna tak tak a awm lo ni nber a hriat thu a sawi bawk.