ZALEN November 18, 2024 : PWD Minister Vanlalhlana chuan khaw awmdanin a zir chhoh tak avanga kawngpui siam that hna an thawk thei ta chu lawmawm a tih thu leh ZPM Ministry-ah mipuiten rinna an la nghah tlat niin a sawi.

PWD Minister chuan, “Kuminah Cyclone Remal vangin lei min a tam hle a, chu chuan hmun 576-ah kan kawngpuite hnawhin mipui tan harsatna a siam a, kum dang zawng aia fur a nat avangin sawrkar chuan theih tawp chhuah mah ila khaw awm danin a zir loh avangin chak takin hma kan la thei lo a ni. Kan theih ang angin kawng chhiahte a theih anga thawm that a ni a, eptu party ten nasa takin politics a inbeih nan an hmanga, khaw tha min pe thei bik lote khan kawng tha pek an phut a, amaherawh chu mipuiten min hrethiam hlein ka hria a, lawmthu ka sawi a ni."

"Tunah chuan khaw awm danin a zir chhoh tak avangin chak zawkin kawng siam hna kan thawk thei ta a, tunhma chuan ‘kawng hmangin sum an siam’ tih tawngkamte kan hre thin a, kalphung thar mipui sawrkar hnuaiah chuan sawrkar sum dik taka hmangin kawng siam that hna kan thawk mek a ni, eptu party lam chuan phunnawina leh dawisel tur an la rawn zawng zel a, nimahsela mipuite hian ZPM ministry ah rinna an la nghat nghet hle a, keini pawhin theih tawp kan chhuah zel dawn ni,” a ti.

Vawiin ZPM chhung inkhawmah Vanlalhlana hian Mizoram kawng dinhmun te a sawifiah a, PWD chan china an hmalak dan te sawiin NHIDCL leh BRO ten hmun tam taka kawngte an enkawl avangin kawngchhia siam that kawngah an che muang thin a, mipuiten harsatna an tawh thin avangin PWD an chet chhuah a ngai leh fo thin tih a sawi bawk.