Aizawl August 3, 2023 : Hmar People Convention chuan thuchhuah siamin ZPM PAC member bang ta Phairothanga'n August 2, 2023-a Press Statement a siama chibil/hnambil politics chawk nung thei a nih avangin an duh loh thu a a tarlan a, '2023 inthlanpui lo awm tura ZPM leh HPC General Headquarter inbiakna Kohhran leh NGO te duhdan kalh a ni' tia a tarlan chu HPC chuan an ngai thu tak hle tih an tarlang.

HPC chuan, "HPC Party chu Registered Party, Election Commission of India hnuaia resgistration nei a ni, he party-ah hian Zofate zawng zawng an leng vek a ni." tiin an thuchhuahah an tarlang a.

HPC Party hian MLA Election apiang hian candidate a siam loh chuan Mizoram party te a thawhpui vek tawh a, Kohhran leh NGO kalh zawngin vawikhatmah a hma a la ngai lo a nih tih Phairothanga hian lo hriatsak se an duh thu an thuchhuahah chuan an tarlang bawk.

HPC chuan, "Hetiang chibil/hnam bil boruak thalo siam thei ang zawnga thuchhuah a siam hi tun hnuah ti tawh lo turin kan ngen a, hnam bil/chi bil boruak chhe thei anga zawnga politics khel tawh lo turin kan ngen nghal bawk a ni," an ti.