ZALEN November 17, 2025: ZPM chuan Party Office-ah chhung inkhawm vawiin khan an hmang a, thusawitu ZPM President Lalliansawta chuan Dampa bial by election-a an chak loh chhanah puh tur an awm a nih chuan amah chu mawhphurtu a nih thu a sawi a, tling zo ta lo Vanlalsailova pawhin an tlin loh chhan bul ber chu amah a nih thu a sawi ve bawk.

Dampa bial by-election neih zawh taka hnehna chang zo ta lo Vanlalsailova chuan, “Vawiinah hian hlawhtlinna avanga lawmthu sawi tur angin thla hmasa lamah te kha chuan kan insuangtuah rilru a ni a. Nimahsela, tunah chuan tlin zawh loh avanga ngaihdam dilna leh hriat thiam ngenna thu sawi a ngai ta. Kan chak loh avanga tute emaw mawhpuh kual tur ka zawng lo va, a chhan bul ber chu keimah ka ni tih ka pawm thlap a ni," a ti. 

Sailova chuan, "He chak lohna hi kan inhmuh chhuah nan Lalpa’n malsawm se ka duh a, politics-a kan hlawhchhamna hian Pathian hmel a tibal tur a ni lo tih hi ka duh dan a ni. Kum 2023 inthlanpuia kalphung thar mipui sawrkar kan din theihna tura a thli tlehtirtute zinga hmanruaah Pathianin min hmang ve a; mahse, inthlanah ka tling zo ta lo. By election-ah ka tling lo leh ta a, a tuartu leh hrehawm ti ber chu keimah ka nih ka ring. Mahse, ZPM hian kan thil tum kan tihhlawhtlinna turin tuna ka dinhmun hi darthlalang atan a rawn hungah ka ngai a, theih tawp chhuahin he ram tan hian hma kan la zel ang,” a ti.