ZALEN October 25, 2025: Vawiin khan Congress party chuan Dampa bye-election lo awm tur atan New W Phaileng, Dinthar Bazar-ah Campaign Kick-off an nei a, he huna thusawitu Dampa bial INC Candidate John Rotluangliana, MPCC Vice President chuan ZPM sawrkarah chuan sum leng vel a awm lo a, dawt leng vel a tam thung niin a sawi.

MPCC Vice President ni bawk pawhin thu sawi in, "Tun tum bye election ah hian a sawrkar lai ZPM hi an hlauthawng hle a, a chhan ka hmuhchhuah chu he sawrkar ah hian mipui an beidawng em em a ni. Buhfai man te hi ₹5 emaw, ₹10 emaw tihpun pawh a awm a ni. Mahse a let thawkin an tipung nia mawle."

"ZPM sawrkar ah hian bazar ah te hian pawisa leng vel hi a awm lo, mahse dawt leng vel a tam thung. Kan ti ang an tih chu an ti lo fai vek a ni. Helai bialah hian Chief Minister Special Package an rawn zuar a, engah nge Chief Minister bialah an zawrh loh? Engah nge Aizawl-ah pawh an zawrh loh? Helai bial-ah chiah an rawn zuar hi an hmusit hle che u a ni." 

"Congress party hian kan ti ang kan tih chu kan ti thin. Tu party in nge ti ve, kum nga chhung khan nuaih nga pek min tiam tute khan min pe em? Nuaih nga ba chunga rawn campaign te kan awm em? Khawnge kawng chhawng te, leiverh te chu? Dawt hmanga ram hruai a hun tawh lo." 

"Social Media-ah hian Congress hi in reh hle mai min ti thin. Social media ah hian MNF leh ZPM hi an pute thil tih sawimam tumin an inhnial nasa a, keini chuan sawi ve tur kan nei lova, kan lo awm ve mai mai a ni." a ti.